गत आइतबार बैठक बसेर निष्कर्षविहिन टुंगिएकोे राष्ट्रिय दलका शीर्ष नेताहरु बैठक पुनः सिंहदरबारमा सुरु भएको छ ।
सिंहदरबारस्थित प्रधानमन्त्री तथा मन्त्रिपरिषद कार्यालयमा राष्ट्रिय मान्यताप्राप्त राजनीतिक दलको बैठक सुरु भएको हो । बैठकमा राष्ट्रिय दलका शीर्ष नेताहरु सहभागी छन् ।
बैठकमा प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली देखि राष्ट्रिय स्वतन्त्र पार्टीका सभापति रवि लामिछाने, राष्ट्रिय प्रजातन्त्र पार्टीका उपाध्यक्ष बुद्धिमान तामाङ समेत सहभागी भएका छन् ।
आइतबार बसेको बैठकमा नेकपा एमालेका तर्फबाट उपाध्यक्ष सुवास नेम्वाङ सहभागी थिए भने सोमबारको बैठकमा भने अध्यक्ष ओली नै सहभागी भएका छन् ।
बैठकमा सुन तस्करी प्रकरणलाई लिएर १९ साउनदेखि नेकपा एमालेले गरिरहेको संसद अवरोध खुलाउने विषयमा छलफल हुनेछ ।
संसदमा प्रमुख प्रतिपक्षको रुपमा रहेको नेकपा एमालेले सुन तस्करी प्रकरणमा गृहमन्त्री र अर्थमन्त्रीमाथि नै छानबिन गर्नुपर्ने साथै उच्चस्तरीय छानबिन समिति गठन गर्नुपर्ने माग राख्दै संसद अवरोध गरिरहेको छ ।
तर सरकारले भने नेपाल प्रहरीको केन्द्रीय अनुसन्धान ब्यूरो नै छानबिन गर्न सक्षम रहेको भन्दै उच्चस्तरीय समिति गठनलाई अस्वीकार गर्दै आएको छ ।
त्रिभुवन विमानस्थल भन्सार कार्यालयबाट बाहिरिएको सुन २ साउनमा सिनामंगलबाट बरामद भएको थियो ।
