बालकुमारी घटनालाई लिएर प्रधानमन्त्री पुष्पकमल दाहाल प्रचण्डले सत्तारुढ गठबन्धनका दलहरुसँग छलफल गर्दैछन् ।
शुक्रबार कोरिया भाषा परिक्षामा आवेदन दिन पाउँ भन्दै प्रदर्शनमा उत्रिएका २ युवाहरुको प्रहरीको दमनका कारण मृत्यु भएको भन्दै चौतर्फी आलोचना भइरहेका बेला उनले सत्तारुढ दललाई छलफलका लागि बालुवाटार बोलाएका हुन् । बैठक २ बजेदेखि प्रधानमन्त्री सरकारी निवास बालुवाटारमा बसिरहेको छ ।
शुक्रबार भएको प्रदर्शनमा प्रहरीले बल प्रयोग गर्दा दैलेखका सुजत रावत र अछामका विरेन्द्र शाहको मृत्यु भएको थियो । सरकारले क्षपिपूर्तिबापट उनीहरुको परिवारलाई १०÷१० लाख रुपैँया दिने घोषणा गरेको छ भने मृतकका परिवारले शाह र रावतलाई शहीद घोषणा गर्न माग समेत गरेका छन् ।
त्यस्तै उक्त घटनाको छानबिनका लागि सरकारले गठन गरेको समिति खारेज गरेर स्वतन्त्र निष्पक्ष न्यायिक छानबिन समिति गठन गरिनुपर्ने परिवारको माग छ ।
सरकारले यसअघि नै ललितपुरका प्रमुख जिल्ला अधिकारी रुद्रप्रसाद पण्डितलाई गृह र ललितपुरका प्रहरी प्रमुख एसएसपी शिद्धिविक्रम शाहलाई हेडक्वार्टर फिर्ता बोलाएको छ भने रोजगार अनुमति प्रणाली (ईपीएस) कोरिया शाखा, ग्वार्कोका कार्यकारी निर्देशक गुरुदत्त सुवेदीलाई जिम्मेवारीबाट हटाएको छ ।
