११ भदौ, काठमाडौं - नेकपा एमालेका अध्यक्ष केपी शर्मा ओलीले सरकारलाई यती, ओम्नी र गिरीबन्धु टी–इस्टेट प्रकरणमा छानबिन गर्न चुनौती दिएका छन् । सोमबार राजधानीमा आयोजित जनप्रतिनिधिसँग केपी ओली कार्यक्रममा बोल्दै उनले यी प्रकरणमा छानबिन गर्दा आफूलाई केही फरक नपर्ने बताएका हुन् ।
उनी भन्छन्, ‘त्यतिबेलादेखि अहिलेसम्म छानबिन गर भनिराखेका छौं त । के यती होल्डिङस, यती होल्डिङस भनेर कराइरहेको, गर न त छानबिन अनि जाऊ आफैं जेलमा’, उनले थपे, ‘वाइडबडीको छानबिन गर, जेल जाऊ । अस्तिसम्म ललितानिवास ललिता निवास भन्दै थिए । अहिले कस्तै भागारे भाग छ । कोही यताबाट कोही उताको ढोकाबाट भागाभाग छ ।’
त्यस्तै सत्तापक्षद्वारा आफूलाई ललिता निवासको विषयमा निरन्तर आरोप लगाइरहेपनि सत्तापक्ष आफैँ त्यस प्रकरणमा फसिरहेको उनले बताएका छन् । उनले गिरिबन्धु टी इस्टेटको जग्गा पहिले कानुनविना नै बिक्री भएकामा आफूले कानुन बनाएर व्यवस्थित गरेको समेत दाबी गरेका छन् ।
‘विना कानुन ०५३ सालमा १९ विघा जमिन बेच्न दिइएको थियो कमिसन खाएर, त्यसको छानबिन गर । २०६० कि कति सालमा बिना कानुन ५१ बिघा जमिन बेच्न दिइएको थियो, कमिसन खाएर । हामीले कानुन बनाइदिएका हौं । अब उपरान्त कानुनसम्मत गर भनेर भनेका छौं ।’ उनले भनेका छन् ।
त्यस्तै उनले पूर्वराजा ज्ञानेन्द्र शाहले ‘कू’ गर्दा आफ्नो पार्टीका वरिष्ठ उपाध्यक्ष ईश्वर पोखरेलले पानी ट्यांकीमा पैसा लुकाएको भ्रम विरोधीहरूले फैलाएको समेत दाबी गरेका छन्।
‘ज्ञानेन्द्र शाहले कू गरेको, ईश्वर पोखरेललाई थुन्दा पानीट्यांकीभरी पैसा लुकायो रे, कहाँ गयो त त्यो पैसा, ज्ञानेन्द्रकहाँ गयो कि कहाँ गयो ?,’ उनले भने, ‘ट्यांकीको पैसा हाजिर गर। फिर्ता गर ट्यांकीको पैसा कति थियो। ईश्वर पोखरेललाई थुन्दा ट्यांकीमा पैसा थियो भने त्यो पैसा कहाँ गयोरु पैसा त थियो होला नि त्यहाँ ?’
त्यस्तै कार्यक्रमलाई सम्बोधन गर्दै उनले नेकपा एमाले कमिसनका पछाडि हिँड्ने पार्टी नभएको र महान उद्देश्यका लागि हिँड्ने पार्टी भएको समेत बताए ।
