काठमाडौं । साफ महिला च्याम्पियनसिप फुटबलअन्तर्गत नेपालले माल्दिभ्सलाई ११ गोलले हराएको छ। सोमबार दशरथ रंगशालामा भएको खेलमा नेपालले ११ गोलको वर्षा गराउँदा माल्दिभ्सले कुनै गोल फर्काउन सकेन । नेपालका तर्फबाट रेखा पौडेल ५ र प्रीति राईले ३ गोल गर्दा सविता रानामगर, अमिषा कार्की र अनिता केसीले पनि एकएक गोल गरेका थिए ।
नेपालले पहिलो खेलमा भुटानसँग गोलरहित बराबरी खेलेको थियो । माल्दिभ्सलाई हराएपछि नेपाल समूहको शीर्षस्थानमा उक्लिएको छ । नेपालको २ खेलबाट ४ अंक भएको छ ।
भुटानको पनि २ खेलबाट ४ अंक छ । भुटानले सोमबार भएको खेलमा श्रीलंकालाई ४-१ गोलले हराएको थियो । पहिलो खेलमा श्रीलंकाले माल्दिभ्सलाई १-० गोलले पराजित गरेको थियो । नेपालले समूहको तेस्रो तथा अन्तिम खेलमा श्रीलंकासँग प्रतिस्पर्धा गर्नेछ ।
कार्तिक ५, २०८१ ०७:५३ मा प्रकाशित
