काठमाडौँ । प्रतिनिधिसभा सदस्य डा. अमरेशकुमार सिंहले कबाड व्यवसायीमाथि अस्तक्षेप गरिएको भन्दै आक्रोस व्यक्त गरेका छन् । बुधबार प्रतिनिधिसभाको बैठकमा बोल्दै शान्तिपूर्ण आन्दोलनमा प्रहरीले दमन गरेको भन्दै उनले आक्रोस व्यक्त गरेका हुन् ।
उनले अदालतबाट आदेश जारी भएपनि कबाड व्यवसायलाई हटाउने कामको विरोध गर्दै प्रदर्शनमा उत्रेका प्रदर्शनकारीमाथि भएको प्रहरी हस्तक्षेप सही नभएको तर्क गरे । उनले भने, मधेशको मान्छे देख्नेबितिकै लाठीचार्ज गर्ने प्रशासनको नीति स्वीकार्य छैन ।’
त्यस्तै उनले कबाड व्यवसायीहरूलाई काठमाडौं महानगरपालिका र महानगरपालिकाका मेयर बालेन शाहले निकै दुख दिएको भन्दै मेयरकै घरमा कवाडी र फोहोर फाल्न आग्रह समेत गरे । ‘यहीँको मेयरले सिकाएको छ कि, यदि काम भएन भने त्यहाँ नै फोहोर थुपार्ने ।’ उनले भने ‘म यही संसद्मार्फत तमाम कबाड व्यवसायीहरूलाई आग्रह गर्न चाहन्छु– सबै फोहोर महानगरपालिका र बालेन शाहको घरको अगाडि थुपारौं ।’
उनले घाइतको उपचार निशुल्क गर्न माग गरेका छन् ।
त्यस्तै आम जनता पार्टीका अध्यक्ष प्रभु साहले कवाड व्यवसायीहरुमाथि प्रहरी दमनका बिषयमा गृहमन्त्रीको जवाफ माग गर्दै दमनमा संलग्नलाई कारवाही गर्नुपर्ने धारणा राखे । शान्तिपूर्ण विरोध प्रदर्शन गर्न नेपाली जनताको संवैधानिक र लोकतान्त्रिक हक बिपरित भएको प्रहरी हस्तक्षेप लोकतन्त्रविपरित रहेको उनले बताए । नेपालका जनताका जीउधन र व्यवसायको ग्यारेन्टीको सवाल सिर्जना भएको उनको भनाइ छ ।
यसअघि मंगलबार कवाड हटाउने निर्णयको विरोध गर्दै काठमाडौं महानगरपालीका घेराउ गर्न खोज्दा कवाडी व्यवसायी र प्रहरीबीच झडप भएको थियो ।
