२७ भदौ, काठमाडौं – दिवंगत एमालेका उपाध्यक्ष सुवासचन्द्र नेम्वाङका दुवै छोरा बुबाको अन्तिम संस्कारका लागि नेपाल आइपुगेका छन् । अष्ट्रेलिया र बेलायत रहेका उनका छोरा काठमाडौँ आइपुगेका हुन् ।
केही दिनअघि घुमघामका लागि अष्ट्रेलिया पुगेका उनका कान्छा छोरा सुहाङ नेम्वाङ हिजोनै नेपाल आएका हुन् भने बेलायतमा रहेका जेठा छोरा मिङ्सो नेम्वाङ बेलायतबाट आज नेपाल आइपुगेका हुन् । मिङ्सो परिवारसहित यूकेमा बसोबास गर्दै आएका छन् ।
विदेशबाट फर्किएका दुवै छोराले एमाले पार्टी कार्यालय च्यासलमा पुगेर बुबालाई अन्तिम श्रद्धाञ्जली अर्पण गरे ।
छोराहरु नेपाल आइसकेपछि नेम्वाङको दाहसंस्कार भोलि हुने भएको छ । उनको दाहसंस्कार हिन्दू र लिम्बू परम्पराअनुसार पशुपति आर्यघाटमा भोलि ११ बजे गरिने छ । उनको निधनको शोकमा सरकारले समेत भोली देशभर सार्वजनिक बिदा दिएको छ ।
भाद्र २७, २०८० ०५:२० मा प्रकाशित
