नेपालगञ्जका चेतन मानन्धरको हत्यारा रिगल भनिने योगराज ढकाललाई सर्वोच्चले पुनः कारागार पठाएपछि चेतन मानन्धरकी पत्नि भारती मानन्धरले सबै निकाय बिकेपनि अदालत नबिक्ने प्रमाणित भएको बताएकी छिन् ।
श्रीमानको हत्यारालाई राष्ट्रपतिले कैद मिनाहा गरेर उन्मुक्ति दिएपनि पीडितको पक्षमा अदालत भएको उनले बताइन् । सिधाकुरासँग कुराकानी गर्दै उनले भनिन्, ‘भलै सरकारको कुर्सि बिकेपनि नेपालको कानुन नबिक्ने रहेछ । हाम्रो नेपालको कानुन नमर्दो रहेछ । यो कुराले मलाई नेपालको कानुनप्रति गर्व लागेको छ ।’
त्यस्तै आफूले दायर गरेको रिटमा आफूले न्याय पाउने आशा नभएको भएपनि अदालतले पीडितलाई हेरेर न्याय दिलाएको उनले बताएकी छिन् । ‘यो भन्दा पहिले म अदालत गएकै थिइनँ, मलाई अदालतको प्रक्रिया थाहा थिएन्् । अदालतमा भएका आनकानी र ढिलासुस्तीले गर्दा मलाई न्याय पाउनेमा आशा थिएन् । तर अन्त्यमा पीडितलाई अदालतले हेरिदिएको छ ।’, उनले भनिन् ।
