१ असोज, काठमाडौं । काठमाडौंको चर्चित समोसा पसल टिपटपलाई काठमाडौं महानगरपालिकाले २ लाख रुपैयाँ जरिवाना गरेको छ । टिपटपले अखाद्य वस्तु बेचेको पाइएपछि जरिवाना तिराइएको हो ।
महानगरपालिकाले पछिल्लो समय बजार अनुमगनलाई तिब्रता दिदै आएको छ । सोही क्रममा काठमाडौं महानगरपालिका–१७ मा अवस्थित टिपटपले बिग्रिएको दुधबरी बेचेको पाइएपछि जरिबाना गरिएको अनुगमन टोलीका सदस्यले बताएका छन् ।
जरिबानासँगै अनुगमन टोलीले कर्मचारीको व्यवहार सुधार गर्न, दुधजन्य वस्तुको तापक्रम कायम राख्न, उक्त दुधबरी बनेको लटमा बनेका अन्य सबै खानेकुरा नष्ट गर्न र अखाद्य वस्तु नबेच्न टिपटपका सञ्चालकलाई आदेश समेत दिएको छ ।
पछिल्ला दिनमा उपत्यकामा चाडपर्व लक्षित अनुगमनलाई तिब्रता दिइएको छ । सोही क्रममा आइतबार ललितपुरको पुल्चोकस्थित भातभटेनी सुपर मार्केट र बिगमार्टलाई पनि जरिबाना गरिएको थियो । भाटभटेनीले अखाद्य वस्तु बेचेको पाइएपछि १ लाख जरिवाना गरिएको थियो भने बिग मार्टले कम तौलको सामान विक्रि गरेको पाइएपछि १० हजार जरिबाना गरिएको थियो ।
