हेटौंडा । गत जेठको ७ गते हेटौंडाको पल्पसा सभा हलमा खाद्य प्रविधि तथा गुण नियन्त्रण कार्यालयले फलफूल बजार गोदाममा रिपेनिङ एजेन्टको प्रयोगको सर्भिलेन्स तथा नियमन सम्बन्धि छलफल कार्यक्रम गरेको थियो । कार्यक्रममा व्यवसायी, सरोकारवाला निकायसहितको सहभागिता थियो ।
हामीलाई यो कार्यक्रमको खर्चमा गडबड छ भन्ने सूचना आएपछि हामी सो कार्यक्रमको खर्चबारे जानकारी माग्न खाद्य प्रविधितथा गुण नियन्त्रण कार्यालय पुग्यौँ । खाद्यले वास्तविक खर्च विवरण, बिल भरपाईहरु देखाउन मानेनन् र कार्यालयका प्रमुख काशीनाथ घिमिरे र खाद्य अनुसन्धान अधिकृत सागर दाहालले विभिन्न आलटाल गर्दै हुँदै नभएको खर्चको हिसाब देखाए ।
खाद्य प्रविधिले वास्तविक विल लुकाएर दिएको विवरणमा कार्यपत्र प्रस्तुतिमा करसहित ५२ सय, स्टेशनरीमा २८ सय, मसलन्दमा २ हजार, ब्रसर ६४ सय, प्रतिवेदक १ हजार, पानी ५ सय, व्यानर १ हजार, सहयोगी भत्ता ३ सय, संयोजक ५ सय गरी १९ हजार ७ सयको खर्च विवरण दिए ।
कार्यक्रमका लागि आवश्यक बजेट अपुग भएको भन्दै खाद्य कार्यालयले मकवानपुर उद्योग वाणिज्य संघसँग कार्यक्रम स्थल, सहभागिहरुलाई चिया विस्कुटको सहयोग मागेको थियो । उद्योग वाणिज्य संघले चिया विस्कुटको रकम तिरीदिएको संघका कृष्णकुमार गुप्ताले जानकारी दिए ।
कार्यक्रममा ३२ जनाको सहभागिता रहेको थियो भने सहभागीहरुले कार्यक्रममा उद्योग वाणिज्य संघले उपलब्ध गराएको चिया विस्कुट बाहेक अन्य केही खाएका थिएनन् । फलफूल सम्बन्धी सचेतनामूलक प्रस्तुति दिईएको कार्यक्रममा सहभागीहरुलाई करीब १०० रुपैयाँ बराबरको स्टेसनरी वितरण गरिएको थियो ।
तर कार्यालयको फाईलमा सहभागी ३२ जनाले ६४ सय बराबरको चिकेन खाजा सेट र चिया खाएको भनेर हेटौंडा ९ पशुपतिनगरको जस्मिन खाजा घरको विल पेश गरिएको छ । जबकी कार्यक्रममा चिया बिस्कुट बाहेक केही खुवाइएको थिएन र सोको बिल समेत उद्योग बाणिज्य संघले तिरेको थियो । हामीले सो दिन खाजा वितरण गरेका खाजा घरका सञ्चालकले उक्त बिल खाद्यका हाकिमरुले आफैँले लेखेको बताए ।
त्यस्तै कार्यक्रममा २८ सयको मात्रै स्टेशनरी खर्च भएको प्रमाण हामीलाई प्राप्त भएको छ । तर सो कार्यक्रममा स्टेशनरीमा ४ हजार ८ सय ५ रुपैयाँ खर्च भएको देखाइएको छ । सो बिल समेत खाद्यका कर्मचारी आफँैले खाली विल ल्याएर अनियमितता गरेको पाइएको छ ।
खाद्य प्रविधि कार्यालयले हामीलाई उपलब्ध गराएको विवरणमा उपभोक्ता अधिकारकर्मी अजय अधिकारी र कुमार पौडेलले कार्यपत्र प्रस्तुतमा २ हजार रुपैंया मसलन्द खर्च भएको उल्लेख छ । तर उपभोक्ता अधिकारकर्मी कुमार पौडेलले आफूहरुले मसलन्द वापत कुनै रकम नलिएको बताए ।
कार्यपक्रम प्रस्तुत गरेवापत प्रमुख काशीनाथ घिमिरे र खाद्य अनुसन्धान अधिकृत सागर दाहालले थप १/१ हजार यताबाट पनि खल्तिमा हालेका छन् ।
खाद्य प्रविधि तथा गुण नियन्त्रण कार्यालय हेटौंडाबाट गत जेठ ७ गते गरिएको कार्यक्रमको जम्मा खर्च १९ हजार ७ सय मध्ये ४५ प्रतिशत भन्दा बढी रकम अनियमितता भएको छ ।
नोटः माथि समाचारमा उल्लेख भएको खर्च विवरण र अनियमितता सम्बन्धी सम्पूर्ण प्रमाणहरु यस भिडियोमार्फत प्रस्तुत गरिएको छ ।
