काठमाडौँ । राष्ट्रिय स्वतन्त्र पार्टीका पूर्वमहामन्त्री डा. मुकुल ढकालले स्पष्टीकरणका लागि पठाइएको पत्रको जवाफ दिएका छन् । पार्टीले दोस्रोपटक सोधेको स्पष्टिकरणको उनले जवाफ दिएका हुन् ।
जवाफमा उनले सभापतिलाई सम्बोधन गरी आफूमाथि गरिएको कारबाहीको कागजात प्रमाणहरुको प्रमाणित प्रतिलिपि उपलब्ध गराउन माग गरेपनि नपाएको र फेरि अर्को स्पष्टिकरण सोधिएको बताएका छन् । उनले सभापतिले विधि विपरित, थितिविपरित हैकमे निरंकुश शासन चलाइरहेको आरोप समेत लगाएका छन् ।
उनले स्पष्टिकरण सोधिएको पत्रमा भनेजस्तो आफुले पार्टीको विधान र आचारसंहिता विपरित कार्य नगरेको दावी गरेका छन् । बरु पार्टी जोगाउन लडिरहेको उनको दावी छ ।
‘आज पार्टीलाई तपाईँ रवि लामिछानेको निरंकुशता, व्यक्ति केन्द्रित व्यवहार र सोचबाट जोगाउन लागिपरेको छु ।’, उनले लेखेका छन्, ‘तपाईँ उपर सत्य र प्रमाणका आधारमा प्रश्न उठाउनु पार्टी विरुद्ध लाग्नु होइन ।’
