काठमाडौँ । ‘पोखरा भ्रमण वर्ष २०२५’ को उद्घाटनका क्रममा घाइते भएको पोखरा महानगरपालिकाका मेयर धनराज आचार्य डिस्चार्ज भएका छन् । भ्रमण वर्ष उद्घाटन गर्ने क्रममा बेलुन विस्फोट भएपछि घाइते भएका मेयर आचार्य बिहीबार कीर्तिपुरस्थित बर्न अस्पतालबाट उपचारपछि डिस्चार्ज भएका हुन् ।
सोही विस्फोटमा परेर घाइते भएका उपप्रधानमन्त्री एवं अर्थमन्त्री विष्णु पौडेल २ दिनको उपचारपश्चात डिस्चार्ज भएका थिए । आचार्यको भने केही बढी क्षति भएको र उनलाई अन्य रोग पनि भएको भन्दै अस्पतालले सो समयमा डिस्चार्ज गरेको थिएन । आचार्यले आफू बिहिबार अपरान्ह डिस्चार्ज भएको सामाजिक सञ्जालमार्फत जानकारी गराएका छन् ।
उनले उपचारमा संलग्न चिकित्सक, स्वास्थ्यकर्मी तथा अस्पताल परिवारप्रति आभार व्यक्त गरेका छन् । त्यस्तै ‘समृद्ध पोखराको आधार, सबल अर्थतन्त्र र पूर्वाधार’ को लक्ष्यलाई अझ प्रभावकारी रूपमा अगाडि बढाउन साथ, सहयोग, र सुझाव अपेक्षित रहने पनि बताएका छन् ।
