काठमाडौँबाट पोखराका लागि उडेका दुई जहाज पोखरामा ल्यान्ड हुन नसक्दा काठमाडौँ फर्किएका छन्। आइतबार बिहान बुद्ध र यति एअरलाइन्सका दुई जहाज काठमाडौँनै फर्किएका हुन् ।
विमानस्थल परिसरमा चरा र किरा फट्याङ्ग्राको गतिविधि बढेपछि विमान अवतरण हुन नसकेको पोखरा अन्तर्राष्ट्रिय विमानस्थल प्रशासनले जनाएको छ । बिहान ८ बजेदेखि चरा र किरा फट्याङ्ग्राको गतिविधि अस्वभाविक बढेपछि विमान अवतरण गर्न नसकिएको प्रशासनले जनाएको छ । अहिले चरा र किराले विमानस्थलको धावनमार्ग नै ढाकेको प्रशासनले जनाएको छ ।
लगातार पानी परेर आज केही मौसम सफा भएपछि राता प्रजातिका किराहरुले विमानस्थल ढाकेको पोखरा अन्तर्राष्ट्रिय विमानस्थलकी निमित्त प्रमुख जसोदा सुवेदीले बताइन् । उनका अनुसार यति र बुद्धका जहाज काठमाडौँ फर्किइसकेका छन् भने बुद्धकै अर्को जहाज आकाशमै होल्ड गरिएको छ ।
चैत्र ११, २०८० ११:३१ मा प्रकाशित
