काठमाडौँ । सरकारले मनसुनको समयमा आउनसक्ने विपद् मध्यनजर गरी आफ्ना तयारी पुरा गरेको जनाएको छ । बुधबार प्रतिनिधिसभा बैठकमा उपप्रधान एवं गृहमन्त्री रवि लामिछानेले विपदमा सरकारको तयारीबारे जानकारी गराएका हुन् ।
उनले विपद्का बेला सम्पर्क गर्नको लागि टोल फ्री नम्बर सार्वजनिक गरेको बताए । उनका अनुसार टोल फ्रि नम्बर ११४९ जुनकुनै बेला सम्पकै गर्न सकिनेछ । यो सँगै सरकारले मनसुनजन्य सूचना दिन र सूचना लिनका लागि कमान्ड पोस्ट खडा गरेको छ । सो कमाण्ड पोस्टले हरेक दिन प्रेस बुलेटिन निकाल्नेछ ।
यो वर्षको विपद्बाट करिब १८ लाख नागरिक र चार लाख १२ हजार घरधुरी प्रभावित हुन सक्ने सरकारले अनुमान गरेको छ । त्यस्तै ८३ हजार परिवार प्रभावित हुने र १८ हजारलाई उद्धार र राहत दिनुपर्ने सरकारको अनुमान छ ।
गृहमन्त्री लामिछानेले जेठ १९ गतेदेखि आगामी असोज १९ गतेसम्मका लागि मनसुनको समय यकिन गरेर पूर्व तयारी गरिएको बताए ।
