काठमाडौँ । मंसिर १६ गते देशका ४१ स्थानीय तहमा उपनिर्वाचन हुँदैछ । उपनिर्वाचन हुने स्थानमा चुनावी माहोलले छपक्कै छोपेको छ । सोही अनुसार राजनीतिक दलहरु चुनावी प्रचार प्रसारमा जुटेका छन् ।
चुनावी प्रचारप्रसारका क्रममा राष्ट्रिय स्वतन्त्र पार्टीका उपसभापति डा. स्वर्णिम वाग्लेले गोरखाकी एक महिलासँग गरेको कुराकानीले अहिले समाजिक सञ्जालमा स्थान ओगटीरहेको छ ।
डा. वाग्ले आफ्ना पार्टीका उम्मेदवार मंगलबहादुर थापालाई भोट माग्न गोरखाको गोरखा नगरपालिका वडा नम्बर ५ सुवाँरा पुगेका थिए । सो क्रममा उनले एक महिलासँग संवाद गरेका छन् । सार्वजनिक भिडियोमा ति महिलाले आफ्नो नाम नानीमैयाँ बानियाँ बताउँछिन् । उनले राष्ट्रिय स्वतन्त्र पार्टीका सभापति रवि लामिछानेमाथि देशका दुई ठूला दलका नेतृत्वकर्ताले अन्याय गरेको बताउँछिन् । वाग्ले आफ्नो पार्टीको चुनाव चिन्ह घण्टिमा भोट हाल्न भन्छन् । त्यसपछि नानीमैयाँ भन्छिन्, ‘म शेर बहादुर र केपी ओलीले रविलाई गरेको अन्याय अत्याचार सहन सकेको छैन ।’
उनले आफू लामिछानेकै छोरी भएकोले रविलाई आफ्नो माइती भाईको दर्जा दिन्छिन् । सो क्रममा रास्वपाका एक व्यक्तिले रास्वपाको झण्डा हातमा थमाइदिन्छन् । उनी थप्छिन्, ‘अत्याचारमा चाहीँ मलाई एकदमै दुखिरहेको छ । त्यसको विरोध गर्ने भोट हालेरै हो । अन्त लड्न जाने ठाउँ छ भनेपनि हामी लड्न जान्छौँ ।’
