१५ भदौ, काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओली सिरहामा केन्द्रिय सचिवालय बैठक सकेर विराटनगर फर्किदै थिए ।
विराटनगर तर्फ जान कोशी पुल पुग्नु अघि बरमझिया पुगिन्छ । बरमझियामा पुग्दा पेडा पसलको लहरो देखिन्छ । धेरैको यो बिसौनी पनि हो ।
नेकपा एमाले अध्यक्ष ओली पनि एकैछिन बरमझियामा बिसाए । कारण थियो कुनै दिन ओलीले यहाँ पेडा पनि बनाएका रहेछन् । ओलीले फेसबुकमा बरमझिया पुगेर पेडा बनाउँदाको क्षण सम्झिएका छन् । ओलीका अनुसार जेलबाट छुटेपछि दुई दिन त्यहाँ पेडा बनाएका थिए ।
ओलीले लेखेका छन् ‘रातिको करिब ९र १० बजेको थियो होला, सिरहाबाट विराटनगर फर्किने क्रममा बाटोमा बरमझिया पेडा पसलमा पुगियो । सप्तरीका बैजनाथ साहले यहाँ पहिलो पटक पेडा बनाएर बेच्न थाल्नु भएको थियो । यहाँ कुनै बेला मैले पनि दुई दिन बसेर पेडा बनाएको थिएँ । अस्ति त्यहाँको पेडा दोकान पुग्दा त्यस बेलाका दिनहरूको सम्झना गरियो ।’
ओलीले सप्तरीमा पेडालाई व्यवसायिक बनाउने बैजनाथ साहको सालिकसँग तस्विर पनि खिचाए । सप्तरीमा बैजनाथ साहको बरमझिया पेडा चर्चित छ ।
