काठमाडाैँ । सूर्यदर्शन सहकारी ठगी मुद्दामा सरकारी पक्षको थुनछेक बहस सकिएको छ । मंगलबारबाट कास्की जिल्ला अदालतका न्यायाधीश नीतिज राईको इजलासमा सुरु भएको थुनछेक बहको दोस्रो दिनमा सरकारी वकिलले बहस गरेका हुन् ।
मंगलबार सहायक न्यायाधिवक्ता सुजता पौडेलले मात्रै बहस गरेकोमा आज न्यायाधिवक्ता कमला काफ्ले, सहायक न्यायाधिवक्ता शान्तिदेवी शर्मा, विपिनराज तिवारी, उपन्यायाधिवक्ता प्रकाश गौतम र नायब महान्यायाधिवक्ता सञ्जीवराज रेग्मीले बहस गरेका हुन् । उनीहरुले रास्वपा सांसदसहित सबै प्रतिवादीलाई कारागार पठाउन माग गर्दै बहस गरेको छन् ।
आज सरकारी पक्षको बहस सकिएसँगै बिहीबारदेखि जाहेरवालाका तर्फबाट बहस हुनेछ । जाहेरवालाका तर्फबाट बहस सकिएपछि प्रतिवादीका तर्फबाट बहस हुनेछ।
दुवैतर्फकाे बहस सकिएपछि प्रतिवादीहरूलाई थुनामै राखेर मुद्दाको फैसला गर्ने कि थुनाबाहिर राखेर गर्ने आदेश अदालतबाट हुनेछ ।
गत पुस ७ गते जिल्ला सरकारी वकिलको कार्यालय, कास्कीले सहकारीको रकम अपचलनको आरोपमा रास्वपा सभापति लामिछानेसहित ४४ जनाविरुद्ध मुद्दा दायर गरेको थियो । लामिछानेमाथि सहकारी ठगीसँगै सङ्गठित अपराध र सम्पत्ति शुद्धिकरण कसुरमासमेत मुद्दा दायर भएको छ ।
सरकारी वकिलको कार्यालयले सूर्यदर्शन सहकारीको रकम ठगी प्रकरणमा अहिलेसम्म ६३ जनाविरुद्ध जिल्ला अदालत कास्कीमा मुद्दा दायर गरिएको जनाएको छ । लामिछानेसहित १९ जनाविरुद्ध सङ्गठित अपराधमासमेत मुद्दा चलाइएको छ । यस्तै लामिछानेसँगै खनाल, जोशी र पछाइविरुद्ध सम्पत्ति शुद्धिकरणमा पनि मुद्दा दायर गरिएको सरकारी वकिलको कार्यालयले जनाएको छ ।
