काठमाडौँ । राष्ट्रिय स्वतन्त्र पार्टीका उपसभापति स्वर्णिम वाग्लेले पार्टी सभापति रवि लामिछानेविरुद्ध माथि सिंगो राज्यशक्ति प्रतिशोध र पूर्वाग्रहका साथ खनिएको बताएका छन् । शुक्रबार प्रतिनिधिसभामा दलको प्रतिनिधित्व गर्दै बोलेका उपसभापति वाग्लेले लामिछानेमाथि राज्यले विभिन्न ठाउँमा विभिन्न मुद्दा लगाउँदै ८४ दिनसम्म थुनाएको बताएका हुन् ।
दुई दुई पटक त्यसमाथि पनि सबैभन्दा धेरै मतका साथ विजयी भएका पार्टी सभापतिविरुद्ध राज्य लागेकै कारण आज संसदका उनलाई देख्न नपाएको उनले दुख व्यक्त गरेका छन् । ‘रवि लामिछानेमाथि सिंगो राज्यशक्ति प्रतिशोध र पूर्वाग्रहका साथ खनिएको छ ।’, उपसभापति वाग्लेले भने, ‘अदालतमा विचाराधिन रहेको विषयमा म धेरै बोल्न मिल्दैन, बोल्दिनँ । न्यायपालिकाको न्यायीक प्रक्रियामाथि रास्वपाको पूर्ण भरोसा छ ।’
त्यस्तै आजभन्दा २० वर्ष अघिको घटना अर्थात २०६१ माघ १९ गते राजा ज्ञानेन्द्रले कु गरेर आफ्नो हातमा शासन लिएको र शाही आयोग बनाएको तर पछि न्यायपालिकाले त्यो असंवैधानिक छ भनेर न्यायिक शासह गरेको बताउँदै वाग्लेले कुनै पनि शक्तिले जे गरे पनि अन्त्यमा न्यायपालिकाले विवेकपूर्ण फैसला गर्ने बताए ।
अदालतप्रति विश्वास हुँदाहुँदै नेपाल सरकार, महान्यायाधिवक्ताको कार्यालय लगायत राज्यका सबै अंगको दुरुपयोग गरेर सभापतिमाथि प्रतिशोधपूर्ण व्यवहार गरिएको उनले बताए । उनले राज्यले गरेको अत्याचारबारे सारा नेपालीले बुझिसकेको समेत बताए ।
उपसभापति वाग्लेले रवि लामिछानेमाथि गरिएको संसद पद निलम्बनको विरुद्ध कानुनी उपचारमा जाने समेत बताए ।
