भदौ २८, मकवानपुर - मकवानपुरको हेटौँडा उपमहानगरपालिका वडा नम्बर १ मा रहेको सन्चो अस्पतालमा कार्यरत डाक्टर विकास थापा तथा प्रशान्त विडारीमाथि भएको कुटपिटमा संलग्न चार जनालाई प्रहरीले पक्राउ गरेको छ ।
सोही अस्पतालमा प्रारम्भिक उपचारपश्चात रेफर गरिएका ४१ वर्षिय राजेश प्रधानको उपचारकै क्रममा २५ गते चितवनमा मृत्यु भएपछि उनीहरु सञ्चो अस्पतालका डाक्टरमाथि कुटपिटमा उत्रिएका थिए ।
राजेशको उपचारमा लापरबाही भएको भन्दै उनका आफन्तसहित केही युवाको समूहले बुधवार डाक्टरलाई अस्पताल भित्रै प्रवेश गरेर कुटपिट गरेका थिए ।
सीसीटीभी फुटेजको आधारमा डाक्टरमाथि आक्रमणमा उत्रिने मृतककी श्रीमती रमा, छोरी रमिता केहीबेर अघि पक्राउ परेका थिए । त्यस्तै घटनामा संलग्न छोरा रोहीत र भतिज अनुप प्रधानलाई पनि प्रहरीले पक्राउ गरेको छ ।
ड्युटीमा रहेको चिकित्सकमाथि अस्पतालभित्रै कुटपिट भएको विरोधमा चिकित्सकहरुले कुटपिटमा उत्रिनेमाथि कारबाही नगरे आफूहरु चरणबद्ध आन्दोलनमा उत्रिने चेतावनी दिएका थिए ।
