काठमाडौँ । नेपाली कांग्रेसका सभापति शेरबहादुर देउवा भारत नजाने भएका छन् । उत्तर प्रदेशस्थित प्रयागराजमा आयोजित एक कार्यक्रममा सहभागी हुन बिहिबार भारत जाने बताइएका देउवाको एकाएक भ्रमण रद्द भएको हो ।
प्रयागराजमा हुने कुम्भ ग्लोबल समिट अन डेभलपमेन्ट एण्ड सस्टेनेबिलिटी कार्यक्रममा सहभागी हुन आज देउवा भारत जाने बताइएको थियो । तर आजै आएर उनको भ्रमण रद्द भएको देउवानिकट स्रोतले बतायो । देउवा प्रयागराजको कार्यक्रम सकेर दिल्ली जाने तयारीमा रहेको तर भारतका शीर्ष नेताले उनीसँग भेट गर्ने समय नदिएपछि उनले भ्रमण रद्द गरेको स्रोतले बतायो ।
देउवा उपस्थित हुने भनिएको सो कार्यक्रममा विभिन्न देशबाट प्रतिनिधित्व गरेर वक्ताहरु उपस्थित हुने जनाइएको छ । देउवा पनि वक्ताका रुपमा त्यहाँ जाने बताइएको थियो । सो कार्यक्रममा भारतको उत्तर प्रदेशका मुख्यमन्त्री योगी आदित्यनाथ समेत सहभागी हुने जनाइएको छ ।
