काठमाडौँ । इजरायली सेनाले नेपाली विपिन जोशीलाई अपहरण गरी शिफा अस्पताल लगिएको भिडियो सार्वजनिक गरेको छ ।
इजरायल डिफेन्स फोर्स (आईडिएफ)ले गएराति ट्वीटरमार्फत भिडियो सार्वजनिक गर्दै यो जानकारी दिएको हो । भिडियो सार्वजनिक गर्दै आईडिएफले लेखेको छ ‘यो नरसंहारको दिन अक्टोबर ७, २०२३ को शिफा अस्पतालको भिडियाे हो, जुन बिहान १०:४२ बजे र ११:०१ बजेको बीचमा इजरायली क्षेत्रबाट अपहरण गरिएका नेपाली नागरिक र एक थाई नागरिकलाई देखाइएको छ, सशस्त्र हमास आतंकवादीहरूले घेरेको छ,’ ।
भिडियो सार्वजनिक गर्दै आइडीएफले भनेको छ, ‘एक जना बन्धक घाइते भएका छन् र उनलाई अस्पतालको बेडमा लगिएको छ र अर्का हिँडिरहेका छन् । यी निष्कर्षहरूले प्रमाणित गर्दछ कि हमास आतंकवादी संगठनले अक्टोबर ७ मा नरसंहारको दिन शिफा अस्पताल परिसरलाई आतंकवादी पूर्वाधारको रूपमा प्रयोग गरेको थियो ।
तेलअबिब स्थित नेपाली दुतावासले समेत इजरायल डिफेन्स फोर्स (आईडिएफ)का प्रवक्तालाई उल्लेख गर्दै विपिन जोशीलाई हमासले कब्जा गरी गाजा तर्फ लगेको जनाएको छ ।
यता नेपाल स्थित परराष्ट्र मन्त्रालयले पनि विपिनलाई गाजाको एक अस्पतालमा सकुशल फेला पारेको जनाएको छ ।
