ओखलढुंगा । ओखलढुंगामा हाइड्रोका मजदुर बोकेको ट्याक्टर दुर्घटना हुँदा १ जनाको मृत्यु भएको छ । जिल्लाको ग्रिनभेन्चर हाइड्रो लिखु फोरमा काम गर्ने मजदुर लिएर जाँदै गरेको को २ त ८६३६ नम्बरको ट्याक्टर खिजीदेम्बा गाउँपालिका १ रगनीको अर्थिङ्गेमोडमा दुर्घटना हुँदा १ जनाको मृत्यु ११ जना घाइते भएका हुन् ।
दुर्घटनामा परि मृत्यु हुनेमा खिजीदेम्बा–३ का १८ वर्षीय आयुष सुनुवार रहेको खिजिदेम्बा गाउँपािलकाका अध्यक्ष गम्बु शेर्पाले जानकारी दिए । उनका उनुसार घाइतेमध्ये २ जनाको अवस्था गम्भिर छ । घाइतेहरुलाई उद्धार गरी कोहीलाई मन्थली हस्पताल र कोहीलाई हेलिकोप्टर मार्फत काठमाडोँ पठाउने तयारी रहेको उनले बताए ।
‘कच्ची सडकमा तिब्र गतिमा सवारी चलाउनु र ट्याक्टरमा मजदुरहरु कोचेर बोक्नु उचित हैन’, अध्यक्ष शेर्पाले भने, ‘मृतकका परिवारलाई उचित क्षतिपूर्ति दिन र घाइतेहरुलाई तत्काल उपचारको बन्दोवस्त मिलाउन हाइड्रोलाई निर्देशनात्मक अनुरोध गर्छु ।’
ट्याक्टरमा १३ भन्दा बढी मजदुरहरु सवार रहेका र घटनास्थलमा प्रहरीसमेत पुगिसकेको अध्यक्ष शेर्पाले जनाए ।
