तनहुँ । निर्वाचन भएको २ वर्षपछि तनहुँको व्यास नगरपालिकाको पुनः मतगणना हुने भएको छ । नगरपालिकाका प्रमुख पदको पुनः मत गणना गर्न उच्च अदालत पोखराले आदेश दिएको हो।
मंगलबार उच्च अदालतका न्यायाधीश राजनप्रसाद भट्टराई र निर्मला पौडेल भट्टराईको इजलासले उक्त आदेश दिएसँगै २०७९ वैशाख ३० मा भएको निर्वाचनको नगरपालिका प्रमुखको मतगणना बदर भएको छ । उक्त नगरपालिकाको प्रमुखको पुनः मतगणना गर्नुपर्ने भएको हो ।
निर्वाचनमा नगरपालिका प्रमुखमा स्वतन्त्र उम्मेदवारी दिएर पराजित भएका दीपकराज जोशीले पुनः मतगणनाको माग गर्दै मुद्धा दर्ता गराएका थिए । उक्त मुद्धाको फैसला गर्दै अदालतले पुनः मतगणनाको आदेश दिएको हो ।
उक्त निर्वाचनमा नेपाली कांग्रेसका बैकुण्ठनाथ न्यौपाने २ सय ५२ मतान्तरले विजयी भएका थिए । न्यौपानेले १२ हजार ७८ र पराजित जोशीले ११ हजार ८ सय २६ मत पाएका थिए ।
जेष्ठ २, २०८१ ०१:२२ मा प्रकाशित
