काठमाडाैँ : प्रधानमन्त्री पुष्पकमल दाहाल प्रचण्डले एनसेलको सेयर खरिद गर्ने शतिसलालसँग आफ्नो मात्र नभएर शेरबहादुर देउवा, केपी शर्मा ओलीको समेत राम्रो सम्बन्ध भएको बताएका छन् ।
मंगलबार राज्य व्यवस्था समितिको बैठकमा बोल्दै प्रचण्डले आफ्नी श्रीमति बिरामी भएर सिंगापुर लैजाँदा उनै एनसेलको सेयर खरिदकर्ताको घरमा बसेको स्विकार गरेका छन् । त्यस्तै उनले शतिसलालसँग नेपाली काँग्रेसका सभापति देउवा र नेकपा एमालेका अध्यक्ष ओलीसँग समेत राम्रो सम्बन्ध भएको बताएका छन् ।
‘एनसेलको सेयर खरिद गर्ने सबैलाई राम्रोसँग चिन्छु । मेरो श्रीमति बिरामी भएको बेला २ पटक सिंगापुर गएको छु । ति साथीहरुकैमा बसेको पनि छु म । शेरबहादुरजी जाँदा पनि बस्नु भएको छ । केपी शर्मा ओलीजी जाँदा पनि बस्नुभएको छ ।’, उनले थपे, ‘बिचबिचमा कुराकानी पनि हुन्छ तर त्यसको अर्थ राष्ट्र र जनताका विरुद्ध, हाम्रो ऐन, कानुनका विरुद्ध, हाम्रो सिस्टमका विरुद्ध कोही जान्छ भने जोसुकै होस, हामी त लड्न तयार भएको हो ।’
त्यस्तै उनले एनसेलको शेयर खरिद बिक्री स्वाभाविक नभएको बताएका छन् । उनले यसमा कहिँ न कहिँ गडबडी भएको आशंका गर्दैं भनेका छन्, ‘जुन सरकारलाई सहज नलागेकै हुनाले मैले सुरुमै निर्देशन जारी गरेको पनि हो । सहज छैन, स्वाभाविक छैन यो खरिदबिक्री भन्ने देखिएकै हुनाले नै निर्देशन जारी गर्नु परेको हो, यसमा कहिँ न कहिँ गलत छ भन्ने लागेकै हुनाले छानबिन समिति बनाइएको हो ।’
