काठमाडौँ । नेकपा एमालेका अध्यक्ष केपी शर्मा ओलीले राष्ट्रपतिको सल्लाहकार बनेको व्यक्तिले राष्ट्रहितका विपरीत अभिव्यक्ति दिनु निन्दनीय भएको बताएका छन् ।
शनिबार काठमाडाैँको टोखामा नेपाल बुद्धिजीवी परिषद्को राष्ट्रिय परिषद् भेला उद्घाटन गर्दै ओलीले एक सय रुपैयाँमा नेपालको नयाँ नक्सा राख्ने सरकारको निर्णयका बिषयमा राष्ट्रपतिका सल्लाहकार चिरञ्जीवी नेपाल दिएको अभिव्यक्ति निन्दनीय भएको बताएका हुन् । उनले नेपालीले कर तिरेको पैसाले राष्ट्रपतिको सल्लाहकार बनेको व्यक्तिले राष्ट्रहितका विपरीत अभिव्यक्ति दिनु गम्भीर बिषय भएको समेत बताए । नेपालले आफ्नो निर्णय गर्दा अर्को देशलाई टाउको दुख्ने र नेपाललाई हेप्ने कुरा स्वीकार्य नभएको उनको भनाइ छ । ओलीले देशको सर्वोच्च संस्था राष्ट्रपति कार्यालय देशको अहित कुरा गर्नेहरुको गुँड लगाउने ठाँउ नभएको जिकिर गरे ।
उनले नेपालीको देशभक्तीलाई चूनौति दिने अधिकार कसैलाई पनि नभएको धारणा राख्नुभयो ।
