उच्च अदालत पाटनले सीप बिल्डिङमा आवेदन दिएका सबैलाई ईपीएस परीक्षामा सामेल गराउन आदेश दिएको छ ।
उच्च अदालतका न्यायाधीश चन्द्रमणी ज्ञवालीको एकल इजलासले परीक्षा दिन चाहाने सबैलाई आवेदन दिन र परीक्षामा सामेल गराउन आदेश दिएको हो ।
यसअघि ईपीएस शाखाले सीप बिल्डिङमा आवेदन दिएकाहरूले उत्पादनमूलक क्षेत्रका लागि आवेदन र परिक्षा दिन नपाउने बताएको थियो । त्यसविरुद्ध उच्च अदालत पाटनमा परेको मुद्धामा अदालतले उनीहरुलाई आवेदन प्रक्रियामा सहभागी गराउन अन्तरिम आदेश जारी गरेको थियो । त्यसपश्चात मुद्दा दर्ता गराउने १८ जनाले आवेदन फाराम समेत भरेका थिए । अन्यले भने फाराम भर्न नपाएको भन्दै शुक्रबार ललितपुरको बालकुमारी क्षेत्रमा प्रदर्शन गरेका थिए । उनीहरुले सार्वजनिक यातायात तोडफोडदेखि मन्त्रीको गाडीसमेत जलाइदिएका थिए । साे झडपमा परी २ जनाको मृत्यु समेत भएको छ ।
अदालतको यो आदेशसँगै उत्पादनमूलक क्षेत्रका लागि आवेदन दिन नपाएका अन्यले समेत आवेदन दिन पाउने भएका छन् ।
