सबै कुरा

प्रहरीद्वारा युवकमाथि कुटपिट घटनाः छानबिन गर्न समिति गठन

सिधाकुरा

सोमबार, माघ ७, २०८१

प्रहरीद्वारा युवकमाथि कुटपिट घटनाः छानबिन गर्न समिति गठन

काठमाडौँ । सामाजिक सञ्जालमा एक युवकमाथि एक प्रहरीले मरणासन्न हुनेगरि कुटपिट गरेको घटनाको छानबिन गर्न समिति गठन भएको छ । चितवनको भरतपुर महानगरपालिकाअन्तर्गतको बाइपास सडकखण्ड भएको उक्त कुटपिटको घटना छानबिन गर्न चितवन प्रहरीले डीएसपी ज्ञानकुमार महतोको नेतृत्वमा पाँच सदस्यीय छानबिन समिति गठन गरेको हो ।

सोमबार बिहानैदेखि सामाजिक सञ्जालमा बर्दीधारी प्रहरीले एक युवकलाई मरणासन्न हुनेगरि कुटपिट गरेको भिडियो भाइरल छ । भिडियोमा केही नेपाल प्रहरी चेकिङका क्रममा रहेको र सोही क्रममा एक युवकमाथि तिनै प्रहरीले कुटपिट गरेको देखिन्छ ।

ती प्रहरीले युवकलाई ‘फोन गर्ने ?, माथिको पावर देखाउने ?’ भन्दै लात्ताले हानेको देखिन्छ भने ती युवक केही पर भाग्न खोज्छन् । युवकलाई पछ्याउँदै गएका प्रहरीले ती युवकमाथि लात्ता प्रहार गर्न छोड्दैनन् । एकछिनमा ती युवक भुइँमा लड्छन् तर पनि प्रहरीले भने उनीमाथि बुट बजार्न छोड्दैनन् ।

बर्दीमा रहेका प्रहरीबाट त्यो हदको क्रुरता देखाएको भन्दै सोमबार बिहानैबाट सामाजिक सञ्जालमा चर्को आलोचना भइरहेको छ ।

चौतर्फी आलोचनापश्चात उक्त घटना छानबिनका लागि छानबिन समिति बनाइएको चितवन प्रहरी प्रमुख एसपी गौतम मिश्रले जानकारी दिए ।

प्रकाशित मिति: सोमबार, माघ ७, २०८१

प्रतिक्रिया दिनुहोस्