काठमाडौं । नेपाली कांग्रेसले राष्ट्रिय सभा निर्वाचनका लागि १० उम्मेदवार टुंगो लगाएको छ । संस्थापन पक्षका ७ र संस्थापन इतर पक्षका ३ गरी १० उम्मेदवार कांग्रेसले टुंगो लगाएको हो ।
राष्ट्रिय सभाका लागि कोशीमा पूर्वमहामन्त्री कृष्ण प्रसाद सिटौलाले टिकट पाएका छन् भने मधेशमा केन्द्रीय सदस्य तथा पार्टीको अनुशासन समितिको संयोजक समेत रहेका आनन्द प्रसाद ढुंगानाले टिकट पाएका छन् ।
यस्तै वाग्मतीमा महिला संघ काठमाडौंको पूर्व अध्यक्ष विष्णु देवी पुडासैनी र तरुण दलको पूर्व अध्यक्ष जितजंग बस्नेतले टिकट पाएका छन् ।
यस्तै गण्डकीमा प्रदेश महामन्त्री किरण बाबु श्रेष्ठ र अपाङ्गता भएका पदम बहादुर परियारले टिकट पाएका छन् ।
लुम्बिनीमा विष्णु देवी सापकोटाले टिकट पाएकी छन् । गुल्मीकी संस्थापन इतर नेता सापकोटाले महिला कोटाबाट टिकट पाएकी हुन् ।
कर्णालीमा प्रदेश महामन्त्री कृष्ण रोकायाले टिकट पाएका छन् ।
सुदूरपश्चिममा कैलालीका पार्टी सभापति नारायणदत्त भट्ट र कञ्चनपुरका पूर्व सभापति बलदेव बोहराले टिकट पाएका छन् ।
