काठमाडाैँ । सामाजिक सञ्जाल तथा अन्य डिजिटल प्लेटफर्ममा एआईको प्रयोग गरी भ्रामक फोटो भिडियो बनाएर सार्वजनिक गर्ने एक जना पक्राउ परेका छन् । नेपाल प्रहरीको साइबर ब्यूरोले चरित्रमा आघात पुर्याउने गरी श्रव्य दृश्य सामग्री बनाएर सार्वजनिक गर्ने बाजुराका रमेश बहादुर रावतलाई पक्राउ गरेको हो ।
ब्यूरोले प्राय विशिष्ट व्यक्तिका फोटो भिडियोलाई तोडमोड गरेर चरित्रहत्या गर्ने र सामाजिक, पारिवारिक र राजनैतिक छविमा असर पुग्ने किसिमका सामाग्री उत्पादन र सार्वजनिक गरेको कसुरमा बाजुराको खप्तड छेडेदह गाउँपालिका ५ का रमेश बहादुर रावतलाई पक्राउ गरेको हो । रावतलाई साउन ३२ गते सिन्धुपाल्चोकबाट पक्राउ गरि काठमाडौँ जिल्ला अदालतबाट ४ दिनको म्याद थपेर अनुसन्धान गरिरहेको जनाएको छ ।
पक्राउ परेका रावतविरुद्ध विद्युतिय कारोबार ऐन, २०६३ अन्तर्गत मुद्दा दर्ता भएर अनुसन्धान भइरहेको प्रहरीले जनाएको छ ।
