२९ भदौ, मकवानपुर । मकवानपुरको हेटौंडास्थित सन्चो अस्पतालमा कार्यरत ७८ जना स्वास्थ्यकर्मीले सामूहिक राजिनामा दिएका छन् । उनीहरुले उक्त अस्पतालमा कार्यरत डा. विकास थापा र प्रशान्त विडारीमाथि कुटपिट गर्नेहरुलाई कारवाहीको माग गर्दै आज आकस्मिक बाहेकका सबै सेवा समेत ठप्प परेका छन् ।
बुधबार हेटौँडा उपमहानगरपालिका–१ स्थित सन्चो अस्पतालमा डा विकास थापा र प्रशान्त बिडारीमाथि कुटपिट भएको घटनाको विरोधमा सबै स्वास्थ्य सेवा बन्द गरिएको हो । उपचार सेवा प्रवाह गर्न सक्ने अवस्था नरहेको भन्दै चिकित्सक आन्दोलित भएपछि आकस्मिकबाहेक सबै सेवा बन्द गरिएको हेटौँडा अस्पतालका मेडिकल सुपरिटेन्डेन्ट डा रामचन्द्र सापकोटाले जानकारी दिए । उक्त घटनाको विरोधमा हेटौँडा अस्पतालको आकस्मिक र फार्मेसी सेवाबाहेक सबै सेवा बन्द गरिएको उनको भनाइ छ । उनका अनुसार अस्पतालमा ओपिडी, बिरामी भर्ना र ल्याबलगायतका सेवा बन्द छन् । जिल्लाका अन्य अस्पताल तथा क्लिनिकमा पनि आकस्मिक र फार्मेसी सेवामात्रै सञ्चालनमा रहेको उनले बताए ।
उक्त घटनालाई लिएर हेटौँडा अस्पतालका ७८ चिकित्सकसहितका स्वास्थ्यकर्मीले सामूहिक राजीनामा दिएको सापकोटाले जानकारी दिए ।
हेटौंडामा डाक्टरमाथि कुटपिट गर्नेलाई ७२ घण्टाभित्र कारबाहीको दायरामा ल्याउन चिकित्सक संघले अल्टिमेटम दिएको थियो । बिहिबार प्रधानमन्त्री तथा मन्त्रिपरिषद्को कार्यालयमा ज्ञापनपत्र बुझाउँदै सरकारलाई अल्टिमेटम दिएको हो । उक्त समयभित्र घटनामा संलग्न दोषीलाई बारबाही नगरे आकस्मिक सेवा बाहेकका अन्य सम्पूर्ण सेवा बन्द गर्ने चेतावनी दिएका थिए ।
तर घटना भएको ४८ घण्टा बित्दा समेत प्रहरीले दोषीलाई कारबाहीको दायरामा नल्याएको भन्दै मकवानपुरका प्रमुख जिल्ला अधिकारीलाई सामूहिक पत्राचारमार्फत आन्दोलनको जानकारी गराइएको छ ।
सीसीटीभी फुटेजको आधारमा प्रहरीले उक्त घटनामा संलग्न ४ जनालाई पक्राउ गरेको छ । उनीहरु सबैजना मृतकका आफन्त हुन् ।
