विराटनगरमा कवाडी गोदाममा आगलागी हुँदा गोदाममा काम गर्ने एक जनाको मृत्यु भएको छ ।
बुधबार दिउँसो विराटनगर महानगरपालिका–७ सातघुम्तीमा रहेको एक कवाडी गोदाममा आगलागी हुँदा एक जनाको मृत्यु हुनुका साथै ४ जना घाइते भएका छन् । आगलागीबाट सख्त घाइते भएका एकको न्यूरो अस्पतालमा मृत्यु भएको हो ।
मृत्यु हुनेको पहिचान खुल्न सकेको छैन भने घाइते हुनेमा अजिता सरदार, सुशीला पासवान, पिंकी कामत र किशोर कामत रहेका छन् ।
आगलागीबाट घाइते भएका अजिता सरदार, सुशीला पासवान, पिंकी कामतको न्यूरो अस्पतालमा उपचार भइरहेको छ भने किशोर कामतको कोसी अस्पतालमा उपचार भइरहेको छ ।
प्रहरीका अनुसार घाइते चारमध्ये दुई जनाको अवस्था गम्भीर छ । त्यस्तै प्रहरीले आगलागीको कारण एकिन नभएपनि अनुसन्धान जारी रहेको बताएको छ ।
मंसिर २०, २०८० ०९:१८ मा प्रकाशित
