काठमाडाैँ । बलात्कार मुद्दामा फसाइदिने भन्दै एक व्यक्तिसँग पैसा लिएको आरोपमा प्रहरी प्रभाग भैँसेपाटीकी प्रमुख इन्स्पेक्टर बिनुकुमारी शाहीलाई जिम्मेवारीबाट हटाइएको छ । बलात्कारसम्बन्धी मुद्दामा ओरोपीसँग मिलेर उनले सो मुद्दा हनिट्रयापमा रूपान्तरण गरेको भन्दै जिम्मेवारीबाट हटाइएको हो ।
इन्स्पेक्टर शाहीमाथि ३० लाख रुपैयाँ लेनदेन गरेको आरोप छ । सोही आरोपमा उनलाई जिम्मेवारीबाट हटाएर अनुसन्धान अघि बढाइएको छ । उनीमाथि अनुसन्धान गर्न ललितपुर परिसरका डीएसपी नरहरि अधिकारीको कमाण्डमा समिति बनाइएको उपत्यका प्रहरी कार्यालय, रानीपोखरीकी प्रमुख एआईजी किरण बज्राचार्यले जानकारी दिइन् । उक्त समितिको प्रतिवेदनका आधारमा शाहीलाई कारबाही गरिने वा नगरिने निक्र्यौल हुने एआईजी बज्राचार्यले बताइन् ।
सोही प्रकरणमा संलग्न अन्य दुई जनालाई पनि प्रहरीले पक्राउ गरेको छ।
शाही यसअघि पनि विवादमा तानिएकी थिइन् । बिनु कञ्चनपुर प्रहरीमा रहँदा एक प्रहरी जवानले उनकै कारण राजीनामा दिनुपरेको बताएका थिए । त्यस्तै समाचार लेखेको आरोपमा जिल्ला प्रहरी कार्यालय कञ्चनपुरले २ जना पत्रकारलाई पक्राउ गरेपछि शाहीको चौतर्फी विरोध भएको थियो ।
