काठमाडौँ । सोनु निगमको कन्सर्टमा राखिएका मदिराजन्य विज्ञापन बोर्ड काठमाडौँ महानगरले हटाएको छ । काठमाडौँ महानगरपालिकाको वडा नम्बर ६ स्थित बौद्ध हायात ग्राउन्डमा आयोजना हुन लागेको कन्सर्टमा अनाधिकृत रूपमा राखिएका १५० वटा मदिराजन्य विज्ञापन बोर्ड महानगर प्रहरीले हटाएको हो।
महानगर प्रहरी बलको विशेष टोली परिचालन गरेर यी बोर्डहरू हटाइएको महानगरले जनाएको छ । । मदिराजन्य सामग्रीको विज्ञापनलाई नियन्त्रण गर्ने महानगरको नीति अन्तर्गत ती बोर्डहरु हटाएको महानगरले जनाएको छ ।
भारतीय चर्चित गायक सोनु निगमले बुधबार साँझ हायात होटलको सो ग्राउन्डमा आयोजना गर्न लागिएको कन्सर्टमा प्रस्तुती देखाउने भएका छन् । त्यसका लागि उनी नेपाल आइसकेका छन् ।
निगम नेपाल आउने भएपछि ग्राउन्डको साथसज्जाका साथै प्रायोजकहरुले विभिन्न ब्राण्डका विज्ञापन बोर्ड राखेका थिए । तीमध्ये मदिराको विज्ञापन गरिएका बोर्ड महानगरले हटाएको हो ।
