पोखरा । राष्ट्रिय स्वतन्त्र पार्टीका सभापति रवि लामिछानेको समर्थनमा पोखरामा प्रदर्शन भएको छ । पार्टी नेता, कार्यकर्ता र समर्थकहरुले उनको समर्थनमा प्रदर्शन गरेका हुन् ।
प्रदर्शनमा उत्रिएका समर्थकहरुले सरकारले सहकारी पीडितलाई न्याय दिलाउन नसक्ने भएपछि रवि लामिछानेसँग प्रतिशोध साँध्ने प्रयास गरेको बताए । त्यस्तै उनीहरुले सहकारी पीडितले न्याय पाउनुपर्ने तर सो बहानामा रविलाई फसाउने षड्यन्त्र गरे त्यसको प्रतिवाद गर्ने बताए ।
उनीहरुले सहकारी पीडितलाई न्याय दे, फासिस्ट सरकार मुर्दावाद, राजनीतिक प्रतिशोध बन्द गर जस्ता नारासहित जिल्ला प्रशासन कार्यालय कास्की अगाडि प्रदर्शन गरेका छन् । आफूहरुको कर्तुत लुकाउन सरकारले नियतवश रवि लामिछानेलाई पक्राउ गर्ने प्रयास गरेको उनीहरुको आरोप छ । त्यस्तै पार्टी सभापतिविरुद्ध प्रतिशोध साँध्ने काम भए आफूहरु चुप लागेर नबस्ने उनीहरुको चेतावनी छ ।
सरकारले कांग्रेस उपसभापति धनराज गुरुङलाई कारबाही गर्नुको सट्टा उनको ठगी लुकाउन प्रमाण नभएपनि जबरजस्ती पक्राउ गर्ने प्रयास गरेको उनीहरुको आरोप छ ।
