१८ भदौ, काठमाडौं । सर्वोच्च अदालतले नेपालगञ्जका रिगल भनिने योगराज ढकालको कैद मिनाहाविरुद्ध परेको रिटमा कारण देखाउ आदेश जारी गरेको छ । सरकारले संविधान दिवसको दिन श्रीमान चेतन मानन्धरको हत्या गर्ने रिगलको कैद मिनाहा गर्ने निर्णय गरेपछि श्रीमती भारती मानन्धरले सर्वोच्चमा रिट दायर गरेकी थिइन् ।
सोही रिटउपर सुनुवाई गर्दै आज सर्वोच्चका न्यायाधीश मनोजकुमार शर्माले सरकारलाई लिखित जवाफ पेश गर्न सात दिनको समय दिएका छन् । रिटको अर्को सुनुवाईको पेशी असोज २५ गतेलाई तोक्न पनि आदेश दिइएको छ ।
भारती मानन्धरले श्रीमान्को हात्यारा रिगलको कैद मिनाहा गर्न गरिएका सबै सिफरिस तथा निर्णयहरु खारेज हुनुपर्ने र रिगललाई फेरि थुनामा पठाउनुपर्ने माग राख्दै रिट दर्ता गरेकी थिइन् । उनी रिले अनसनमा समेत बसेकी छिन् ।
असोज ३ गते संविधान दिवसका दिन सरकारको सिफारिसमा राष्ट्रपति रामचन्द्र पौडेलले ७५ कारागारमा कैद सजाय काटिरहेका ६७० जना कैदीको माफी मिनाहा गरेका थिए । जस मध्ये नेपालगंजका रिगल भनिने योगराज ढकालले २०७२ साल असार २८ गते नेपालगञ्जका चेतन मानन्धरको खुँडा प्रहार गरि हत्या गरेका थिए । चेतनको हत्या गर्दा रिगल तरुण दल बाँके ३ का सभापति थिए ।
हत्या गरेर फरार भएका रिगललाई २०७६ वैशाखमा जिल्ला अदालत बाँकेका न्यायाधीश विष्णु सुवेदीले सर्वस्वसहित जन्मकैदको सजाय सुनाएका थिए । रिगलले २०८० भदौ सम्म ४० प्रतिशत मात्रै सजाय भुक्तानी गरेका थिए ।
असल चालचलन भएको भन्दै संविधान दिवसका दिन नेपाल सरकारको सिफारिसमा राष्ट्रपति रामचन्द्र पौडेलले ६० प्रतिशत कैद मिनाहा गरेका थिए ।
सम्बन्धित समाचार :
बिच चोकमा खुँडा हान्ने ‘रिगल’लाई १२ वर्ष कैद माफी दिनेहरु...
श्रीमानको हत्यारालाई माफी दिएको भन्दै भारतीको माइतिघरमा रिले अनसन
रिगलको सजाय मिनाहा गर्ने राष्ट्रपतिको निर्णयविरुद्ध सर्वोच्चमा रिट, फेरि थुनामा पठाउन माग
हत्यारालाई माफी दिएर कानूनको दुरुपयोग भएको भन्दै रवि लामिछानेद्वारा राष्ट्रपतिलाई ध्यानाकर्षण
राष्ट्रपति ज्यू ! हत्यारालाई माफी दिएर पाप गर्नु भयो: भारती मानन्धर (भिडियाेसहित)
