काठमाडाैँ : नेपालगञ्जमा खुँडा प्रहार गरी चेतन मानन्धरको हत्या गरेका रिगल भनिने योगराज ढकालको संविधान दिवसको अवसरमा राष्ट्रपति रामचन्द्र पौडेलले सजाय मिनाहा गरेपछि चेतनकी श्रीमति भारती मानन्धर काठमाडौँ आएर अनसन बसेकी छिन् । 

श्रीमानको न्यायको माग गर्दै काठमाडौँ आएर भारती बुधबारबाट काठमाडौँको माइतीघरमा अनसन बसेकी हुन् । 

माइतिघरमा उनी २ घण्टाका लागि अनसन बसेपनि त्यसपछि भने आशिष मल्ल ठकुरी, दीपक थापा, गणेश जोशी अनसन बस्ने छन् ।

त्यस्तै उनले श्रीमानको हत्या गरेका रिगल भनिने योगराज ढकालको सजाय मिनाहाको विरुद्ध सर्वोच्च अदालतमा रिट समेत दर्ता गरेकी छिन् । चेतनकी श्रीमती भारती मानन्धरले राष्ट्रपतिले गरेको निर्णय बदर गरी रिगललाई फेरि थुनामा पठाउन माग गर्दै रिट दायर गरेकी हुन् । 

उनले रिगलको कैद मिनाहाको लागि जिल्ला कारागार र जिल्ला प्रशासन कार्यालय दाङ, गृह मन्त्रालय, महान्यायाधिवक्ता कार्यालय र मन्त्रीपरिषद्को निर्णय पनि बदर हुनुपर्ने माग राखेकी छिन् । 

असोज ३ गते संविधान दिवसका दिन सरकारको सिफारिसमा राष्ट्रपति रामचन्द्र पौडेलले ७५ कारागारमा कैद सजाय काटिरहेका ६७० जना कैदीको माफी मिनाहा गरेका थिए ।  जस मध्ये  नेपालगंजका रिगल भनिने योगराज ढकालले २०७२ साल असार २८ गते नेपालगञ्जका चेतन मानन्धरको खुँडा प्रहार गरि हत्या गरेका थिए । चेतनको हत्या गर्दा रिगल तरुण दल बाँके ३ का सभापति थिए ।

हत्या गरेर फरार भएका रिगललाई २०७६ वैशाखमा जिल्ला अदालत बाँकेका न्यायाधीश विष्णु सुवेदीले सर्वस्वसहित जन्मकैदको सजाय सुनाएका थिए । रिगलले २०८० भदौ सम्म ४० प्रतिशत मात्रै सजाय भुक्तानी गरेका थिए ।

असल चालचलन भएको भन्दै संविधान दिवसका दिन नेपाल सरकारको सिफारिसमा राष्ट्रपति रामचन्द्र पौडेलले ६० प्रतिशत कैद मिनाहा गरेका थिए ।

सम्बन्धित समाचार :

रिगलको सजाय मिनाहा गर्ने राष्ट्रपतिको निर्णयविरुद्ध सर्वोच्चमा रिट, फेरि थुनामा पठाउन माग

बलिन्द्र धारा आँशु बगाउँदै राष्ट्रपतिलाई भारतीको प्रश्न : मेरो ठाउँमा तपाईंको छोरी भएको भएपनि हत्यारालाई माफी दिनुहुन्थ्यो ?

हत्यारालाई माफी दिएर कानूनको दुरुपयोग भएको भन्दै रवि लामिछानेद्वारा राष्ट्रपतिलाई ध्यानाकर्षण

राष्ट्रपति ज्यू ! हत्यारालाई माफी दिएर पाप गर्नु भयो: भारती मानन्धर (भिडियाेसहित)