२ असोज, काठमाडौं । ६० किलो सुन प्रकरणमा तस्करीको सेटिङ मिलाउनेदेखि व्यवस्थापन गर्ने सम्मको भुमिका निभाएका बेल्जियम नागरिक दावा छिरिङसँग सम्बन्ध देखिएका बिध ल्यावका सञ्चालक भिमकान्त भण्डारीलाई सिआइबीले 'झारा टार्ने' कागज मात्रै गराएको पाइएकोे छ ।
दावा र भिमकान्तबीच भएको संवादको जगमा टेकेर भिमकान्तले दिएका अभिव्यक्ति तथा बयान, उनकै बोलिसँग मात्रै होइन, दावा छिरिङको बयानसँग पनि बाझिएको छ । तर सीआईबीले उनको बयानमा 'फ्याक्ट चेक' त परको कुरा 'वान लाइन सवाल' सोधेर थप प्रश्नै नगरेको पाइएको छ ।
माओवादी उपमहासचिव वर्षमान पुनका प्रिय पात्र भिमकान्तलाई कागज गराएर थप अनुसन्धान नै नगरी उन्मुक्ती दिइएको छ ।
सीआईबीको अनुसन्धान प्रतिवेदनका आधारमा जिल्ला सरकारी वकिलको कार्यालयले अदालतमा पेश गरेको अभियोजन पत्रमा बिध ल्यावका सञ्चालक भिमकान्त भण्डारी कसूरमा सहभागी भएको तर अनुसन्धान नगरिएकाले थप अनुसन्धान गरि अभियोग पत्र ल्याइने भनेको छ ।
कसूरमा सहभागी भनिएका भण्डारीलाई सीआईबी उपस्थित गराएर कागज मात्रै गराइएको छ । तर सीआईबीमा उनले दिएको बयान र दावा छिरिङले दिएको बयान बाझिएको छ ।
साथै सिधाकुराको ‘द सेक्रेट्स अफ गोल्ड माफियामा’ भण्डारीले दिएको जवाफ पनि उनले सीआईबीमा दिएको बयानसँग बाझिएको छ ।
भिमकान्तले दावासँगको सम्बन्धका बारेमा ४ ठाँउ ४ वटा बयान दिएका छन् । तर पनि दावाले दिएको बयानसँग उनले दिएको बयान मिल्दैन ।
सुरुमा भिमकान्तको संवाद सार्वजनिक गर्दा दावासँगको सम्बन्ध के हो भनी सोधेका थियौँ । त्यसको जवाफमा सुरुमा त उनले ‘दावालाई चिन्दीन किन चिन्नु ?’ भनेको थिए ।
(यो लिङ्कमा भिमकान्त भण्डारीको पूर्ण अडियो सुन्न सकिन्छ)
तर एकैछिनपछि उनले बोली फेर्दै ३ वर्षअघि कोरोनाको स्वास्थ्य सामग्री खरिदका लागि दावा सम्पर्कमा आएका बेला भेट भएको तर कारोबार नभएको दाबी गरेका थिए । साथै आफ्नो विदेशमा कुनै व्यवसाय नभएकाले विदेशीसँग कुरै नहुने समेत बताएका थिए ।
छिनछिनमा बोले फेर्ने भिमकान्तले सीआईबीमा पुगेर बयान पनि फेरेका छन् । सीआईबीमा उनले दिएको बयान, केही समयअघि हामीलाई दिएको उनकै प्रतिक्रियासँग बाझिन्छ ।
दावासँग एक पटक कोभिडको स्वास्थ्य सामाग्री खरिदबारे कुरा हुँदा दावा भेट्न आएको तर त्यसपछि कुरा नभएको बताएका भिमकान्तले सीआईबीमा भने दावासँग एक हैन अनेक व्यवसायको विषयमा कुरा भएको बताएका छन् ।
सीआईबीलाई दिएको बयान दावा र आफ्नो पहिलो भेट वर्षमान पुन उर्जामन्त्र भएको समयमा ५ वर्ष अघिनै उर्जा मन्त्रालयमै भएको बताएका छन् । सोहि समयमा मोवाइल नम्बर साटासाट भए पश्चात दावा छिरिङसँग विभिन्न व्यवसायसँग सम्बन्धित कुराहरु फोन र विच्याटमा हुने गरेको बताएका छन् । तर यसअघि भने उनले ‘दावासँग फोन सोन, च्याट स्याट’ मा कुरै नहुने भन्दै झुट बोलेका थिए ।
सुरुमा कोभिडको सामाग्री खरिदका विषयमा कुरा भएको बताउने भण्डारीले बयानका क्रममा भने दावासँग नागढुङ्गा–नौबिसे सडक विस्तारको ठेक्का र ठेकेदार कम्पनी खोज्ने विषयमा कुरा भएको बताएका छन् । साथै उनले दावाले कोभिडको भ्याक्सिन उत्पादकसँग सम्पर्क गराइदिएको र त्यसबापत एडभान्समा १० लाख रुपैयाँ दावालाई दिएको समेत खुलाएका छन् ।
सँगै दावाले चाइनिज गाडीको डिष्ट्रीब्युटर मिलाइदिन्छु भनेको बयान दिएका छन् । तर डिष्ट्रीब्युटर नमिलाइदिएको र बरु सामाजिक संजालबाट दावाले ब्लक गरेको दाबी गरेका छन् ।
त्यसबाहेक उनले दावाकी श्रीमती अमला रोकासँग गाडीको व्यापार गर्ने कुरा भएको तर व्यवसायिक सहकार्य नभएको बताएका छन् ।
उनले दावाको परिवारसँग व्यवसायिक सहकार्य नभएको दाबी गरेपनि भिमकान्त भण्डारीको नाममा रहेको ‘बिध अटोमोवाइल्स’मा दावा पत्नी अमला रोकाको ५ हजार कित्ता शेयर रहेको छ भने भिमकान्त भण्डारीको ४९ लाखको शेयर रहेको छ । भिमकान्तले दावाको सम्बन्ध बारे दिएको बयान पनि दावाको बयानसँग मेल खाँदैन ।
दावाले आफ्नो बयानका क्रममा भिमकान्तले चाईनाबाट आयात हुने ईलेक्ट्रीक गाडीहरुको नेपालको लागि एजेन्ट बन्न चिनियाँ कम्पनीसँग कुरा गराइदिनु भनेको हुँदा सोही विषयमा कुराकानी भएको हो भन्ने मात्रै जवाफ दिएका छन् ।
उनलाई सिआइबीले सवाल न ५७ मा भिमकान्त भण्डारीसँग विच्याटमा आर्थिक कारोबार सम्बन्धी कुराकानी भएको देखिएको हुँदा तपाईहरु बिच के कस्तो आर्थिक कारोबार रहेको थियो भन्ने प्रश्न गरेको थियो । यसको जवाफमा दावाले एउटा कारोबारको मात्रै सामान्य जवाफ दिएका छन् ।
सीआईबीले त्यसपछि उनलाई थप सवाल नै गरेको छैन् । सिआइबी स्रोतका अनुसार भिमकान्त भण्डारीलाई सोधपुछका लागि सिआइबीमा बोलाउँदा उनले नयाँ फोन लिएर गएका थिए । उनको सोही फोन परीक्षणका लागि सीआईबीले फरेन्सिक ल्यावमा पठाएको छ । जबकी दावा छिरिङसँग संवाद हुने फोन उनले सीआईबीमा लगेकै थिएनन् । अनुसन्धानमा विश्वमै ख्याती कमाएको नेपाल प्रहरीले यति सामान्य कुरालाई पनि नजरअन्दाज गर्दै बरु उनले बोकेर गएको नयाँ फोन फरेन्सिकका लागि पठायो । नयाँ फोनमा कुनै पनि पुरानो विवरण नहुने भएपछी उनलाई चोख्याउनका लागि यस्तो गरिएको हुन सक्ने अनुसन्धानमा खटिएका प्रहरी स्रोतकै दाबी छ ।
र्सेक्रेट्स अफ गोल्ड माफियाका श्रृङ्खलाहरु
श्रृङ्खला १ : सुन तस्कर जोगाउन प्रधानमन्त्री र गृहमन्त्रीको दबाबमा गैरकानूनी अनुसन्धान
श्रृङ्खला २ : सुन तस्करीमा ‘बिध ल्याब’का मालिक भिमकान्त भण्डारी
श्रृङ्खला ४ : EXCLUSIVE : सुन तस्करीका नाइके दावासँग पूर्व IGP धीरज प्रताप सिंहको ‘हिमचिम’
