दाङ । दाङमा लागुऔषध ब्राउन सुगर र नगद रकम सहित दुई जना पक्राउ परेका छन् । सोमबार अन्दाजी ९ बजेतिर दाङको देउखुरीमा अबस्थित इलाका प्रहरी कार्यालय गढवाबाट खटिएको प्रहरी टोलीले गढवा गाउँपालिका ६ स्थित गढवा बजारबाट लमही तर्फ जाँदै गरेको रा ८ प ४७८९ नम्बरको मोटरसाइकल चेकजाँच गर्दा अवैध लागुऔषध ब्राउन सुगर र नगद रकम सहित दुई जनालाई पक्राउ गरेको हो ।
पक्राउ पर्नेमा बाँके जिल्ला खजुरा गाउँपालिका ७ बढवाका अन्दाजी २० वर्षिय सहिद रजा खाँ र सोही स्थानका मेराज खानका छोरा अन्दाजी २६ वर्षिय महमद ईस्तिका खान रहेको इलाका प्रहरी कार्यालय गढवाका प्रमुख प्रहरी निरीक्षक कालिका कार्कीले बताइन ।
उनीहरुको साथबाट ३ ग्राम ६६० मिलिग्राम ब्राउन सुगर, १ लाख ३९ हजार ५ सय रुपैँया नगद, ५ थान मोबाइल (स्क्रीन टच ४ थान र एक थान सादा) र एक थान मोटरसाइकल बरामद गरेको प्रहरीले जनाएको छ । पक्राउ परेका दुवै जनाको थप अनुसन्धान भइरहेको प्रहरीको भनाइ छ ।
