जनमत पार्टीले वर्तमान राजनीतिक विषम परिस्थितिका कारण आन्दोलनका लागि तयारी गर्न पार्टी संरचनालाई निर्देशन दिएको छ ।
आइतबार पार्टीको केन्द्रीय कार्यालय मध्यबानेश्वरमा बसेको सचिवालय बैठकको निर्णय अनुसार सबै तहका सङ्गठनलाई आन्दोलनको लागि तयार रहन आदेश दिइएको पार्टीका प्रवक्ता शरदसिंह यादवले जानकारी गराएका छन् ।
बैठकले मङ्सिरमा हुने स्थानीय तहको उपनिर्वाचनका लागि १४ कात्तिकसम्म उम्मेदवारको नाम केन्द्रीय सचिवालयमा पठाउन पार्टीका सदस्यहरूलाई निर्देशन समेत दिएको छ । बैठकमा स्थानीय उपनिर्वाचनको लागि जिल्ला इन्चार्जको संयोजकत्वमा निर्वाचन परिचालन समिति गठन गर्ने निर्णय गरेको छ ।
बैठकले स्थानीय उपनिर्वाचनको लागि जिल्ला इन्चार्जको संयोजकत्वमा निर्वाचन परिचालन समिति गठन गर्ने र निर्वाचन समितिमा निर्वाचन हुने वडा र पालिकाको केन्द्रीय समिति सदस्य, राष्ट्रिय परिषद् सदस्य, प्रदेश सदस्य, पालिका अध्यक्ष, पालिका पूर्व अध्यक्ष, वडा अध्यक्ष र वडा पूर्व अध्यक्ष रहने व्यवस्था पार्टीले गरेको छ ।
