काठमाडौँ । नेपाल प्रहरीले बुढानिलकण्ठको बिभिन्न क्षेत्रमा आर्टिफिसियल इन्टेलिजेन्स (एआई)मा आधारित सीसीक्यामेरा जडान गरेको छ । ‘सुरक्षित काठमाडौँ उपत्यका, हाम्रो प्रतिबद्धता’ अभियान अनुरुप उक्त क्षेत्रमा क्यामेरा जडान गरिएको प्रहरीले जनाएको छ ।
काठमाडौँ उपत्यका प्रहरी कार्यालय रानीपोखरी र उपत्यका बिभिन्न स्थानीय तह मिलेर उपत्यका बिभिन्न स्थानमा अत्याधुनिक क्यामेरा जडान गर्ने कार्यलाई तीव्रता दिइएको हो । सीसीक्यामेरा उपत्यकाको शान्ति सुरक्षा र अपराध नियन्त्रण प्रभावकारी हुने काठमाडौं उपत्यका प्रहरी कार्यालय रानीपोखरीका प्रवक्ता एसएसपी दिनेशराज मैनालीले बताउँछन् । प्रहरीले अटोमेटिक नम्बर प्लेट पहिचान र फेस पहिचान क्यामरा जडान द्रूत गतिमा गरिरहेको मैनालीले जानकारी दिए । उनका अनुसार कोटेश्वर, महाराजगंज र बसपार्क क्षेत्रमा आर्टिफिसियल इन्टेलिजेन्स ट्राफिक सिस्टम क्यामरा जडान भईसकेको छ ।
जडान गरिएका क्यामेराले कैद गर्ने नम्वर प्लेट र फेस प्रहरीको सर्भरमा रहने भएकाले अपराध गरेर भाग्नेहरुलाई नियन्त्रणमा लिन सहज हुने मैनालीले बताए ।
उपत्यका बिभिन्न स्थानमा अत्याधुनिक क्यामेरा जडान गर्ने कार्य जारी रहेको र यसका कारण अपराध नियन्त्रण र अनुसन्धानमा सहज हुने प्रहरीको विश्वास छ ।
