इलामका ६ वटा पालिकाले खाना र सभा संचालनमा ठूलो रकम खर्च गरेको पाइएको छ । आर्थिक बर्ष २०७९/८०मा खाना र सभा संचालनमा मात्रै यी पालिकाले १ करोड ७९ लाख ४० हजार खर्च गरेको महालेखापरीक्षकको प्रतिवेदनले जनाएको छ ।
सबैभन्दा धेरै खर्च गर्नेमा सन्दकपुर गाउँपालिका रहेको छ । महालेखाको प्रतिवेदन अनुसार यो पालिकाले खाना तथा विविध खर्चमा ४३ लाख ८७ हजार रुपैयाँ र सभा संचालनमा ३ लाख ४४ हजार रुपैयाँ खर्च गरेको छ । आन्तरिक आयको ६७.१२ प्रतिशत खर्च गरेको भन्दंै महालेखाले यो पालिकाललाई खर्चमा मितव्ययी बन्न निर्देशन दिएको छ ।
यस्तै माई नगरपालिकाले पनि आन्तरिक आयको ठूलो रकम खर्च गरेको छ ।यो पालिकाले ४१ लाख ९५ हजार रुपैंयाँ खानामा र सभा संचालनमा ३ लाख ३२ हजार रुपैंयाँ खर्च गरेको छ ।
रोङ गाउँपालिकाले सभा संचालन सहित २६ लाख ६२ हजार,फाकफोकथुम गाउँपालिकाले २१ लाख ९७ हजार,माङसेबुङ गाउँपालिकाले १९ लाख ९१ हजार र देउमाई नगरपालिकाले १८ लाख ३२ हजार रुपैयाँ खर्च गरेको प्रतिवेदनमा उल्लेख छ ।
हरेक बर्ष महालेखाले स्थानिय तहलाई फजुल खर्च नियन्त्रण गर्न निर्देशन दिएपनि इलामका स्थानिय तहहरुले यसलाई लत्याउँदै आएका छन् ।महालेखाले अनुत्पादक क्षेत्रमा लगानी र वितरणमुखी कार्यक्रमलाई समेत रोक्नुपर्नेमा जोड दिदै आएको छ ।
