ढोरपाटन। राष्ट्रपति रामचन्द्र पौडेल बागलुङको पञ्चकोट पुगेका छन् । बुधबारदेखि आयोजित ब्रह्माण्डीय महायज्ञमा सहभागी हुन राष्ट्रपति बागलुङ पुगेका हुन्।
राष्ट्रपति पौडेल पञ्चकोटमा राखिएको पाँच हजार पाँच सय ५५ किलोको महाघण्ट उद्घाटन गर्ने कार्यक्रम रहेको छ ।
पञ्चकोटमा अनन्तश्री ब्रह्माण्डीय महायज्ञ सञ्चालन भएको छ। महायज्ञमा राष्ट्रपति पौडेलले अर्चना गर्ने कार्यक्रम छ।
पञ्चकोटलाई धार्मिक पर्यटकीय गन्तव्यका रुपमा विकास गर्न यहाँ महाघण्ट राखिएको हो।
विसं २०७१ देखि पञ्चकोटमा धार्मिक संरचना बनाउन सुरु गरिएको थियो। गत साता महाघण्टलाई पञ्चकोट ल्याइएको थियो।
पञ्चकोटमा अहिलेसम्म सिस महल, गण्डकीमाताको मन्दिर, यज्ञशाला, हनुमानको विशाल मूर्तिलगायत दर्जनौँ धार्मिक संरचना बनिसकेका छन्।
पञ्चकोटमा निर्माण गर्न लागिएको एक सय आठ फिट अग्लो गण्डकी विश्वशान्ति कलशको नजिकै महाघण्ट राखिएको छ।
महाघण्ट बनाउन करिब दुई करोड खर्च लागेको अनुमान गरिएको छ।
फाल्गुन १०, २०८० ११:०७ मा प्रकाशित
