विराटनगर : कोशी प्रदेशका नवनियुक्त मुख्यमन्त्री केदार कार्कीले विश्वासको मत पाएका छन् ।
९३ सदस्यीय प्रदेशसभामा बहुमतका लागि ४७ मत आवश्यक पर्छ जहाँ कार्कीले ८६ मत पाएका हुन् ।
बुधबार बैठकमा उपस्थित ९१ सांसदमध्ये ८६ ले पक्षमा र ५ जनाले विपक्षमा मत हालेकाे हुन् ।
आफ्नो पार्टीका ८ सहित एमालेका ३९ सांसदको समर्थनमा गत शनिबार मुख्यमन्त्री बनेका कांग्रेस नेता कार्कीले नियुक्तिको ५ दिनमै प्रदेशसभाबाट विश्वासको मत लिएका हुन् ।
उनले संविधानको धारा १६८ (४) अनुसार विश्वासको मत लिएका हुन्। जहाँ मुख्यमन्त्री नियुक्त भएको ३० दिनभित्र विश्वासको मत लिनुपर्ने हुन्छ ।
प्रदेशसभामा उपसभामुखसहित एमालेका ४०, कांग्रेसका २९, माओवादी केन्द्रका १३, राप्रपाका ६, नेकपा एकीकृत समाजवादीका ४ र जनता समाजवादी पार्टीको १ जना सांसद छन् ।
संविधानको धारा १६८ को उपधारा ५ बमोजिम नेपाली कांग्रेसको शेखर कोइराला समूहका कार्की नेकपा एमालेका प्रदेश सभा सदस्यहरुको समर्थनमा शनिबार मुख्यमन्त्रीमा नियुक्त भएका थिए ।
