बारा । बारामा सवारी दुर्घटना हुँदा २ भारतीय नागरिकको मृत्यु भएको छ । सिमराबाट हेटौँडातर्फ जाँदै गरेको ना ६ ख ३३५२ नम्बरको ट्रक र हेटौँडाबाट पथलैयातर्फ आउँदै गरेको बा प्र ०१–०२६ च १३३४ नम्बरको बोलेरो पिकअप आज बिहान ५ः३५ बजे बाराको जितपुरसिमरा उपमहानगरपालिका– १ स्थित आधाभार जंगलमा ठोक्किएर दुर्घटना भएको प्रहरीले जनाएको छ ।
पिकअपमा सवार पाँचजनामध्ये दुर्घटनामा परी भारतको बिहार राज्य मोतीहारी जिल्ला मधुवन थानाग्राम कुन्दनपुर घर भएका २८ वर्षीय चन्दन चौहान र अर्का एकजना सनाखत हुन नसकेका बोलेरोचालकको मृत्यु भएको प्रहरीले जनाएको छ । उनीहरूको परवानीपुर गाउँपालिकास्थित एलएस न्युरो अस्पताल बारामा उपचारको क्रममा मृत्यु भएको हो ।
घाइतेमध्ये भारतको बिहार राज्य मुजफ्फरपुर जिल्ला परखन मोतीपुर थाना दरुराजग्राम सिसुवा घर भएका २२ वर्षीय राहुल चौधरीको अवस्था गम्भीर रहेको छ ।
यस्तै, भारत बिहार राज्य महाराजगन्ज जिल्ला गोरखपुर घर भएका १७ वर्षीय सुदीप चौहान र भारत बिहार राज्य महाराजगन्ज जिल्ला गोरखपुर घर भएका १९ वर्षीय रामलखन चौहानको अवस्था मध्यम रहेको अस्पतालले जनाएको छ । ट्रक चालकलाई इलाका प्रहरी कार्यालय सिमराले नियन्त्रणमा लिएको डिएसपी प्रदिप बहादुर क्षेत्रीले जानकारी दिए ।
