१४ भदौ, सुर्खेत । प्रधानमन्त्री पुष्पकमल दाहाल ‘प्रचण्ड’ ले आफ्ना पार्टीका नेताहरुमाथिको छानबिन रोक्न सीआईवीलाई दबाब नदिएको बताएका छन् । सुर्खेतमा आयोजित समाजवादी मोर्चाको सन्देश सभालाई सम्बोधन गर्दै उनले जो कोहीमाथि अनुसन्धान गर्न प्रहरी स्वतन्त्र रहेको र आफूले कुनै दबाब नदिएको बताएका हुन् ।
उनले भनेका छन्, ‘ माओवादी र प्रचण्डले आफ्नो मान्छे जोगाउँछ कांग्रेस र एमालेका मान्छेहरुलाई हान्छ भनेर निकै हल्ला भयो । मैले सीआईबीलाई यदि दोषी देखिन्छ भने माओवादीको जोसुकै नेता भएपनि, बाटोमा प्रचण्ड देखियो भने त्यसलाई पनि नछोड भनिसकेको छु । यो कुरा मैले गहिरोगरी सबैलाई विचार गर्न अनुरोध गर्छु ।’
पछिल्लो समय सुन प्रकरणलगायत भ्रष्ट्राचारसम्बन्धी काण्डहरुमा माओवादी निकट नेताहरुको संलग्नता रहेको आशंका गरिएको छ । सोही कारण प्रधानमन्त्रीले उनीहरुलाई जोगाउन प्रहरीलाई चर्को दबाब दिएको अरोप प्रधानमन्त्री प्रचण्डले खेप्दै आएका छन् । उनले सुर्खेतबाट अनुसन्धान आफूलाई गर्नुपर्ने भएपनि तयार रहेको बताएका हुन् ।
