महोत्तरी । महोत्तरी सदरमुकाम जलेश्वर नगरपालिका २ पुरानो माछा बजारस्थित एक घरमा आगलागी भएको छ । जलेश्वर २ निवासी विपति साहको घरमा सटर भाडा अरविन्द साहले संचालन गरेको खुस्बु टेण्ट हाउसमा शुक्रबार अपरान्ह १२ बजेतिर आगलागी भएको हो ।
आगलागी भएको केही समयमै जलेश्वर नगरपालिकाको वारुण यन्त्र घटना स्थलमा पुगेको थियो तर एउटा मात्र वारुण यन्त्रले आगो नियन्त्रणमा लिन नसकेपछि मटिहानी र रामगोपालपुर नगरपालिकाबाट समेत वारुण यन्त्र बोलाइएको थियो । तीनओटा बारुण यन्त्र, प्रहरी, सशस्त्र प्रहरी, नेपाली सेना तथा स्थानीयको प्रयासपछि बल्ल आगो नियन्त्रणमा आएको थियो ।
आगलागीका क्रममा ग्यास सिलिण्डर पड्किएकोले आगो थप फैलिएको स्थानीयको भनाई छ । आगलागीबाट भएको क्षतिको विवरण आईसकेको छैन भने आगलागीको कारणबारे प्रहरीले अनुसन्धान गरिरहेको छ ।
आश्विन ११, २०८१ ०२:४१ मा प्रकाशित
