काठमाडाैँ । अखिल नेपाल फुटबल संघ (एन्फा) का उपाध्यक्ष दावा लामा पक्राउ परेका छन्।
लागूऔषध मुद्दामा दोषी ठहरिएका उनी फरार थिए । उनलाई काठमाडौँ उपत्यका अपराध अनुसन्धान कार्यालयको टोलीले पक्राउ गरिएको प्रहरीले जनाएको छ ।
२०६१ साउन ८ गते काठमाडौँबाट ५ ग्राम खैरो हेरोइनसहित पक्राउ परेका उनलाई उच्च अदालत पाटनले २०६४ जेठ २० गते लागुऔषध कारोबारमा ५ वर्ष कैद र ५ हजार रुपैयाँ जरिबाना सजाय तोकेको थियो । त्यस्यता फरार रहेका उनी पक्राउ परेका हुन् ।
सर्लाही घर भएर काठमाडौँ बस्दै आएका लामालाई लागूऔषध कारोबारमा २०६१ साल भदौ २५ गते काठमाडौँ जिल्ला अदालतले पुर्पक्षका लागि थुनामा पठाएको थियो। त्यस्तै उनलाई जिल्ला अदालतले २०६२ जेठ १० मा ६ महिना मात्र कैद सजाय फैसला सुनाएपछि उनी कारागारबाट निस्किएका थिए ।
जिल्ला अदालतको फैसलाविरुद्ध सरकारी वकिलको कार्यालयले पुनरावेदन गरेको थियो। जसमा उच्च अदालत पाटनले दावा लागुऔषध प्रयोगकर्ता मात्रै नभएर कारोबारी समेत भएको ठहर गर्दै ५ वर्ष कैद र ५ हजार रुपैयाँ जरिबाना सजाय तोकेको हो ।
