१४ असाेज, काठमाडाैँ : सरकारले सुन तस्करीको छानबिनका लागि ४ सदस्यीय उच्चस्तरीय आयोग गठन गरेको छ ।
संसद्मा प्रतिनिधित्व गर्ने दलहरुबीचको सहमतिको आधारमा आइतबार बसेको मन्त्रिपरिषद्को आकस्मिक बैठकले उच्चअदालतका पूर्वन्यायाधीश डिल्लीराम आचार्यको संयोजकत्वमा ४ सदस्यीय उच्चस्तरीय आयोग गठन गरेको हो ।
४ सदस्यीय आयोगको सदस्यहरूमा अर्थमन्त्रालयका किशोरजंग कार्की, गृहमन्त्रालयका प्रेमराज जोशी र पूर्वएआईजी सहकुल थापा रहेका छन् ।
‘मन्त्रिपरिषद्ले असोज ५ गते नै आयोग गठन गर्ने निर्णय गरेको थियो । तर त्यसमा केही समस्याहरू थिए,’ संचारमन्त्री रेखा शर्माले भनिन्, ‘अहिले ती समस्या रहेका विषयहरू सहमति भएपछि आयोगलाई पूर्णता दिइएको छ ।’
आयोगले सुन पैठारी, तस्करी नियन्त्रण गर्न सुझावसहितको प्रतिवेदन दिनेछ ।
आश्विन १४, २०८० ०५:३१ मा प्रकाशित
