काठमाडौँ । बालगायक सचिन परियारको निधन भएको छ । महाराजगञ्जस्थित शिक्षण अस्पतालमा उपचाररत परियारको बिहिबार निधन भएको हो । बिहीबार बिहान करिब १० बजे उनको निधन भएको उनका बुवा तेजेन्द्र परियारले जानकारी दिएका थिए भने यो विषय अस्पताल प्रशासनले समेत जानकारी दिएको छ ।
पछिल्लो एक हप्तादेखि सचिनको स्वास्थ्य अवस्थामा समस्या आएको र उपचारको लागि रकम आवश्यकता भएको भन्दै उनका बाबु तेजेन्द्रले आर्थिक सहयोगको याचना गरेका थिए । बिहिबार उपचारकै क्रममा उनको निधन भएको हो ।
सानै उमेरमा आफ्नो कलाले परिचित सचिनले थुप्रै गीत गाएका छन् भने केही म्युजिक भिडियोमा अभिनयसमेत गरेका छन् । उनले ‘रातो रबर एक’, ‘रुमाल खस्छ की’, ‘के छ हजुर’, ‘बरको छाँयाले’ लगायत गीत गाएका छन् । उनले महानायक राजेश हमालसँग एक म्युजिक भिडियोमा अभिनय गरेका थिए भने हास्य श्रृङ्खला ‘मेरी बास्सै’मा पनि अभिनय गरेका थिए ।
