काठमाडौँ । नेपाल राष्ट्र बैंकका गभर्नर महाप्रसाद अधिकारीले सहकारी बचतकर्ताको रकम फिर्ता गर्न बचतका आधारमा तीन चरणको बर्गिकरण गर्न सुझाव दिएका छन् ।
सिंहदरबारमा सोमबार बसेको सहकारीको संस्था बचत रकम सम्वन्धमा संसदीय छानबिन समिति बैठकमा अधिकारीले एकलाख सम्मका बचतकर्ता, पाँच लाखसम्मका बचतकर्ता र सो भन्दा बढि बचत गर्ने बचतकर्ता गरि तीन चरणमा बर्गिकरण गरि रकम फिर्ता गर्न सहज हुने सुझाव दिएका हुन् ।
उनले समस्याग्रस्त सहकारीका सम्बन्धमा बिशेष टीम गठन सकिने पनि सुझाव दिनुभएको समिति संयोजक सूर्य थापाले बताए । भूगोलको सीमा नराखिएको, असीमित बचत संकलन गर्न दिइएको, नियमनलाई कम महत्व दिएको र सुपरीवेक्षण हुन नसकेको कारणले सहकारीमा समस्या देखिएको धारणा गभर्नरले राखेको थापाले जानकारी दिए । समिति संयोजक थापाले समितिमा गभर्नरका साथै बैंकर्स एशोसिएसन, कर्जा सूचना केन्द्र, पछिल्लो सहकारी सुझाव समितिसंग पनि छलफल गरेको जानकारी दिए । छलफलका क्रममा एउटै कर्जा सूचना केन्द्र बनाउन सकिने समेत सुझाव आएको थापाले बताए ।
समितिले अर्को बैठकमा सहकारी बिभागका पूर्व रजिष्टारहरुसँग छलफल गर्ने जनाएको छ । समिति सभापति थापाले सहकारी पिडितको बचत स्वयं सहकारी संस्थाहरुबाटै असुलउपर गर्नुपर्छ भन्नेमा स्पष्ट रहेको जिकिर गरे ।
