इँटाभट्टामा जिउँदै मानिस जलाएको घटनाका अभियुक्त कांग्रेस नेता मोहम्मद अफताब आलमको मुद्दा स्थगितको सूचीमा परेको छ ।
७ न्यायाधीशकाे दरबन्दी रहेको जिल्ला अदालत रौतहटमा आइतबार २ जना मात्र न्यायाधीश उपस्थित थिए । अदालतमा आइतबार न्यायाधीश तेजबहादुर खड्का र गेहेन्द्रराज पन्तकाे मात्रै उपस्थित थियाे । उनीहरु दुवै जनाले फाँट नम्बर ५ को गोला नतानेपछि उक्त मुद्दा स्थगितको सूचीमा परेको हो ।
२०६४ सालको संविधानसभा निर्वाचनको समयमा रौतहटको राजापुरमा बम विस्फोट भएको र पोल खुल्ने डरले बम विस्फोटका घाइतेहरुलाई इँटा भट्टामा हालेर जलाएको आरोप लागेका उनको मुद्दामा अन्तिम सुनुवाइका लागि आज पेसी तोकिएको थियो ।
उक्त मुद्दामा गत कात्तिकमा अदालतले सरकारी वकिल र आलमका वकिललाई १५ दिनभित्र बहस नोट पेश गर्न आदेश दिएको थियो । सरकारी वकिल र आलमका वकिलका तर्फबाट बहस नोट प्राप्त भइसकेकाले रौतहट जिल्ला अदालतले मुद्दामा अन्तिम सुनुवाइका लागि पेसी तोकेको हो ।
२०७६ कात्तिक १८ मा उनीविरुद्ध ‘विस्फोटक पदार्थ बम समेतको प्रयोग गरी ज्यान मार्ने उद्योग तथा कर्तव्य ज्यानसम्बन्धी कसुर’मा रौतहट जिल्ला अदालतमा मुद्दा दायर भएको थियो । मुद्दाको थुनछेक बहसपछि आलम २०७६ कात्तिक २९ गतेदेखि पुर्पक्षका लागि थुनामा छन् ।
पुस २९, २०८० ११:१५ मा प्रकाशित
